maine yun in sard labon ko rakkha un ruKHsaron par

maiñ ne yuuñ in sard laboñ ko rakkhā un ruḳhsāroñ par

jaise koī bhuul se rakh de phūloñ ko angāroñ par

chhup gayā eid kā chāñd nikal kar der huī par jaane kyoñ

nazreñ ab tak Tikī huī haiñ masjid ke mīnāroñ par

aatī jaatī sāñsoñ par vo dil ke taḌapne kā aalam

jaise koī naach rahā ho do-dhārī talvāroñ par

barsoñ baad jo ghar meñ lauTā dekh ke āñkheñ bhar aa.iiñ

ab tak un kā naam likhā thā ghar kī sab dīvāroñ par

mausam-e-gul phir aaya shāyad phir ik vahshat jaag uThī

vo dekho sabza ug aaya zindāñ kī dīvāroñ par

pairoñ meñ bāñdhe baiThe haiñ ham ḳhud hī zanjīr-e-ma.āsh

aur yāroñ ne jast lagā dī dekho chāñd sitāroñ par

main ne yun in sard labon ko rakkha un ruKHsaron par

jaise koi bhul se rakh de phulon ko angaron par

chhup gaya eid ka chand nikal kar der hui par jaane kyon

nazren ab tak Tiki hui hain masjid ke minaron par

aati jati sanson par wo dil ke taDapne ka aalam

jaise koi nach raha ho do-dhaari talwaron par

barson baad jo ghar mein lauTa dekh ke aankhen bhar aain

ab tak un ka nam likha tha ghar ki sab diwaron par

mausam-e-gul phir aaya shayad phir ek wahshat jag uThi

wo dekho sabza ug aaya zindan ki diwaron par

pairon mein bandhe baiThe hain hum KHud hi zanjir-e-maash

aur yaron ne jast laga di dekho chand sitaron par