main sochta hun agar is taraf wo aa jata

maiñ sochtā huuñ agar is taraf vo aa jaatā

charāġh-e-umr kī lau ik zarā baḌhā jaatā

ajiib bhūl-bhulayyāñ hai rāsta dil kā

yahāñ to ḳhizr bhī hotā to Dagmagā jaatā

so apne haath se diiñ bhī gayā hai duniyā bhī

ki ik sire ko pakaḌte to dūsrā jaatā

magar nahīñ hai vo masrūf-e-nāz itnā bhī

kabhī kabhī to koī rābta kiyā jaatā

kabhī vo paas bulātā to ye dil-e-durvesh

bas ik ishāra-e-abrū pe jhūmtā jaatā

palaT rahā huuñ usī yār-e-mehrbāñ kī taraf

ab is qadar bhī nahīñ bevafā huā jaatā

palaT gayā inhīñ qadmoñ se 'āftāb-husain'

kahāñ talak vahī hālāt dekhtā jaatā

main sochta hun agar is taraf wo aa jata

charagh-e-umr ki lau ek zara baDha jata

ajib bhul-bhulayyan hai rasta dil ka

yahan to KHizr bhi hota to Dagmaga jata

so apne hath se din bhi gaya hai duniya bhi

ki ek sire ko pakaDte to dusra jata

magar nahin hai wo masruf-e-naz itna bhi

kabhi kabhi to koi rabta kiya jata

kabhi wo pas bulata to ye dil-e-durwesh

bas ek ishaara-e-abru pe jhumta jata

palaT raha hun usi yar-e-mehrban ki taraf

ab is qadar bhi nahin bewafa hua jata

palaT gaya inhin qadmon se 'aftab-husain'

kahan talak wahi haalat dekhta jata