manzar-e-ruKHsat-e-dildar bhulaya na gaya

manzar-e-ruḳhsat-e-dildār bhulāyā na gayā

dil ka.ī roz talak raah pe laayā na gayā

ḳhāna-e-dil kī tabāhī kā deñ ilzām kise

aap ke ba.ad yahāñ koī bhī aayā na gayā

ḳhaak tasvīr musavvir se banegī terī

dūsrā tujh sā ḳhudā se bhī banāyā na gayā

de gayā ḳhuub sazā mujh ko koī kar ke muaaf

sar jhukā aise ki tā-umr uThāyā na gayā

laakh duniyā ne mire sher pe dī daad to kyā

jis kī ḳhātir thā likhā us ko sunāyā na gayā

vaqt ke saath 'sadā' badle ta.alluq kitne

tab gale milte the ab haath milāyā na gayā

manzar-e-ruKHsat-e-dildar bhulaya na gaya

dil kai roz talak rah pe laya na gaya

KHana-e-dil ki tabahi ka den ilzam kise

aap ke baad yahan koi bhi aaya na gaya

KHak taswir musawwir se banegi teri

dusra tujh sa KHuda se bhi banaya na gaya

de gaya KHub saza mujh ko koi kar ke muaf

sar jhuka aise ki ta-umr uThaya na gaya

lakh duniya ne mere sher pe di dad to kya

jis ki KHatir tha likha us ko sunaya na gaya

waqt ke sath 'sada' badle talluq kitne

tab gale milte the ab hath milaya na gaya