mata-e-be-baha hai dard-o-soz-e-arzumandi

matā-e-be-bahā hai dard-o-soz-e-ārzūmandī

maqām-e-bandagī de kar na luuñ shān-e-ḳhudāvandī

tire āzād bandoñ kī na ye duniyā na vo duniyā

yahāñ marne kī pābandī vahāñ jiine kī pābandī

hijāb iksīr hai āvāra-e-kū-e-mohabbat ko

mirī ātish ko bhaḌkātī hai terī der-paivandī

guzar-auqāt kar letā hai ye koh o bayābāñ meñ

ki shāhīñ ke liye zillat hai kār-e-āshiyāñ-bandī

ye faizān-e-nazar thā yā ki maktab kī karāmat thī

sikhā.e kis ne ismā.īl ko ādāb-e-farzandī

ziyārat-gāh-e-ahl-e-azm-o-himmat hai lahad merī

ki ḳhāk-e-rāh ko maiñ ne batāyā rāz-e-alvandī

mirī mashshātgī kī kyā zarūrat husn-e-ma.anī ko

ki fitrat ḳhud-ba-ḳhud kartī hai laale kī hinā-bandī

mata-e-be-baha hai dard-o-soz-e-arzumandi

maqam-e-bandagi de kar na lun shan-e-KHudawandi

tere aazad bandon ki na ye duniya na wo duniya

yahan marne ki pabandi wahan jine ki pabandi

hijab iksir hai aawara-e-ku-e-mohabbat ko

meri aatish ko bhaDkati hai teri der-paiwandi

guzar-auqat kar leta hai ye koh o bayaban mein

ki shahin ke liye zillat hai kar-e-ashiyan-bandi

ye faizan-e-nazar tha ya ki maktab ki karamat thi

sikhae kis ne ismail ko aadab-e-farzandi

ziyarat-gah-e-ahl-e-azm-o-himmat hai lahad meri

ki KHak-e-rah ko main ne bataya raaz-e-alwandi

meri mashshatgi ki kya zarurat husn-e-mani ko

ki fitrat KHud-ba-KHud karti hai lale ki hina-bandi