mauj-e-gham is liye shayad nahin guzri sar se

mauj-e-ġham is liye shāyad nahīñ guzrī sar se

maiñ jo Duubā to na ubharūñgā kabhī sāgar se

aur duniyā se bhalā.ī kā sila kyā miltā

aa.ina maiñ ne dikhāyā thā ki patthar barse

kitnī gum-sum mire āñgan se sabā guzrī hai

ik sharar bhī na uḌā ruuh kī ḳhākistar se

pyaar kī jot se ghar ghar hai charāġhāñ varna

ek bhī sham.a na raushan ho havā ke Dar se

uḌte bādal ke ta.āqub meñ phiroge kab tak

dard kī dhuup meñ niklā nahīñ karte ghar se

kitnī ra.anā.iyāñ ābād haiñ mere dil meñ

ik ḳharāba nazar aatā hai magar bāhar se

vādī-e-ḳhvāb meñ us gul kā guzar kyuuñ na huā

raat bhar aatī rahī jis kī mahak bistar se

tān-e-aġhyār suneñ aap ḳhamoshī se 'shakeb'

ḳhud palaT jaatī hai Takrā ke sadā patthar se

mauj-e-gham is liye shayad nahin guzri sar se

main jo Duba to na ubharunga kabhi sagar se

aur duniya se bhalai ka sila kya milta

aaina main ne dikhaya tha ki patthar barse

kitni gum-sum mere aangan se saba guzri hai

ek sharar bhi na uDa ruh ki KHakistar se

pyar ki jot se ghar ghar hai charaghan warna

ek bhi shama na raushan ho hawa ke Dar se

uDte baadal ke taaqub mein phiroge kab tak

dard ki dhup mein nikla nahin karte ghar se

kitni ranaiyan aabaad hain mere dil mein

ek KHaraba nazar aata hai magar bahar se

wadi-e-KHwab mein us gul ka guzar kyun na hua

raat bhar aati rahi jis ki mahak bistar se

tan-e-aghyar sunen aap KHamoshi se 'shakeb'

KHud palaT jati hai Takra ke sada patthar se