maze jahan ke apni nazar mein KHak nahin

maze jahān ke apnī nazar meñ ḳhaak nahīñ

sivā.e ḳhūn-e-jigar so jigar meñ ḳhaak nahīñ

magar ġhubār hue par havā uḌā le jaa.e

vagarna taab o tavāñ bāl-o-par meñ ḳhaak nahīñ

ye kis bahīsht-shamā.il kī aamad aamad hai

ki ġhair-e-jalva-e-gul rahguzar meñ ḳhaak nahīñ

bhalā use na sahī kuchh mujhī ko rahm aatā

asar mire nafas-e-be-asar meñ ḳhaak nahīñ

ḳhayāl-e-jalva-e-gul se ḳharāb haiñ mai-kash

sharāb-ḳhāne ke dīvār-o-dar meñ ḳhaak nahīñ

huā huuñ ishq kī ġhārat-garī se sharminda

sivā.e hasrat-e-tāmīr ghar meñ ḳhaak nahīñ

hamāre sher haiñ ab sirf dil-lagī ke 'asad'

khulā ki fā.eda arz-e-hunar meñ ḳhaak nahīñ

maze jahan ke apni nazar mein KHak nahin

siwae KHun-e-jigar so jigar mein KHak nahin

magar ghubar hue par hawa uDa le jae

wagarna tab o tawan baal-o-par mein KHak nahin

ye kis bahisht-shamail ki aamad aamad hai

ki ghair-e-jalwa-e-gul rahguzar mein KHak nahin

bhala use na sahi kuchh mujhi ko rahm aata

asar mere nafas-e-be-asar mein KHak nahin

KHayal-e-jalwa-e-gul se KHarab hain mai-kash

sharab-KHane ke diwar-o-dar mein KHak nahin

hua hun ishq ki ghaarat-gari se sharminda

siwae hasrat-e-tamir ghar mein KHak nahin

hamare sher hain ab sirf dil-lagi ke 'asad'

khula ki faeda arz-e-hunar mein KHak nahin