ba-wafai ki ada pane laga hun tujh mein

bā-vafā.ī kī adā paane lagā huuñ tujh meñ

ai jafā-dost ye kyā dekh rahā huuñ tujh meñ

tū ne ab tak mujhe kāñToñ ke sivā kuchh na diyā

maiñ to ik phuul kī mānind khilā huuñ tujh meñ

tū vo dariyā hai ki jis kā koī sāhil hī nahīñ

maiñ safīne kī tarah Duub gayā huuñ tujh meñ

merā da.avā hai ki tū ne bhī na dekhe hoñge

aise jalve ki jo maiñ dekh chukā huuñ tujh meñ

tujh se bichhḌe to zamāna huā lekin ab tak

yaad aatā hai ki kuchh bhuul gayā huuñ tujh meñ

tere chehre se haTā.ī nahīñ jātīñ nazreñ

kyā ḳhabar der se kyā dekh rahā huuñ tujh meñ

paas itnā ki tirī saañs se Takrātī hai saañs

duur itnā ki tujhe DhūñDh rahā huuñ tujh meñ

bevafā terī zabāñ par ye vafā kī bāteñ

aisā lagtā hai ki maiñ bol rahā huuñ tujh meñ

ba-wafai ki ada pane laga hun tujh mein

ai jafa-dost ye kya dekh raha hun tujh mein

tu ne ab tak mujhe kanTon ke siwa kuchh na diya

main to ek phul ki manind khila hun tujh mein

tu wo dariya hai ki jis ka koi sahil hi nahin

main safine ki tarah Dub gaya hun tujh mein

mera dawa hai ki tu ne bhi na dekhe honge

aise jalwe ki jo main dekh chuka hun tujh mein

tujh se bichhDe to zamana hua lekin ab tak

yaad aata hai ki kuchh bhul gaya hun tujh mein

tere chehre se haTai nahin jatin nazren

kya KHabar der se kya dekh raha hun tujh mein

pas itna ki teri sans se Takraati hai sans

dur itna ki tujhe DhunDh raha hun tujh mein

bewafa teri zaban par ye wafa ki baaten

aisa lagta hai ki main bol raha hun tujh mein