chalte hue mujh mein kahin Thahra hua tu hai

chalte hue mujh meñ kahīñ Thahrā huā tū hai

rasta nahīñ manzil nahīñ achchhā huā tū hai

ta.abīr tak aate hī tujhe chhūnā paḌegā

lagtā hai ki har ḳhvāb meñ dekhā huā tū hai

mujh jism kī miTTī pe tire naqsh-e-kaf-e-pā

aur maiñ bhī baḌā ḳhush ki are kyā huā tū hai

maiñ yuuñ hī nahīñ apnī hifāzat meñ lagā huuñ

mujh meñ kahīñ lagtā hai ki rakkhā huā tū hai

vo nuur ho aañsū ho ki ḳhvāboñ kī dhanak ho

jo kuchh bhī in āñkhoñ meñ ikaTThā huā tū hai

is ghar meñ na ho kar bhī faqat tū hī rahegā

dīvār-o-dar-e-jāñ meñ samāyā huā tū hai

chalte hue mujh mein kahin Thahra hua tu hai

rasta nahin manzil nahin achchha hua tu hai

tabir tak aate hi tujhe chhuna paDega

lagta hai ki har KHwab mein dekha hua tu hai

mujh jism ki miTTi pe tere naqsh-e-kaf-e-pa

aur main bhi baDa KHush ki are kya hua tu hai

main yun hi nahin apni hifazat mein laga hun

mujh mein kahin lagta hai ki rakkha hua tu hai

wo nur ho aansu ho ki KHwabon ki dhanak ho

jo kuchh bhi in aankhon mein ikaTTha hua tu hai

is ghar mein na ho kar bhi faqat tu hi rahega

diwar-o-dar-e-jaan mein samaya hua tu hai