har dhaDkan haijaani thi har KHamoshi tufani thi

har dhaḌkan haijānī thī har ḳhāmoshī tūfānī thī

phir bhī mohabbat sirf musalsal milne kī āsānī thī

jis din us se baat huī thī us din bhī be-kaif thā maiñ

jis din us kā ḳhat aayā hai us din bhī vīrānī thī

jab us ne mujh se ye kahā thā ishq rifāqat hī to nahīñ

tab maiñ ne har shaḳhs kī sūrat mushkil se pahchānī thī

jis din vo milne aa.ī hai us din kī rūdād ye hai

us kā blouse nāranjī thā us kī saarī dhānī thī

uljhan sī hone lagtī thī mujh ko aksar aur vo yuuñ

merā mizāj-e-ishq thā shahrī us kī vafā dahqānī thī

ab to us ke baare meñ tum jo chāho vo kah Daalo

vo añgḌā.ī mere kamre tak to baḌī rūhānī thī

naam pe ham qurbān the us ke lekin phir ye taur huā

us ko dekh ke ruk jaanā bhī sab se baḌī qurbānī thī

mujh se bichhaḌ kar bhī vo laḌkī kitnī ḳhush ḳhush rahtī hai

us laḌkī ne mujh se bichhaḌ kar mar jaane kī Thānī thī

ishq kī hālat kuchh bhī nahīñ thī baat baḌhāne kā fan thā

lamhe lā-fānī Thahre the qatroñ kī tuġhyānī thī

jis ko ḳhud maiñ ne bhī apnī ruuh kā irfāñ samjhā thā

vo to shāyad mere pyāse hoñToñ kī shaitānī thī

thā darbār-e-kalāñ bhī us kā naubat-ḳhāna us kā thā

thī mere dil kī jo raanī amrohe kī raanī thī

har dhaDkan haijaani thi har KHamoshi tufani thi

phir bhi mohabbat sirf musalsal milne ki aasani thi

jis din us se baat hui thi us din bhi be-kaif tha main

jis din us ka KHat aaya hai us din bhi virani thi

jab us ne mujh se ye kaha tha ishq rifaqat hi to nahin

tab main ne har shaKHs ki surat mushkil se pahchani thi

jis din wo milne aai hai us din ki rudad ye hai

us ka blouse naranji tha us ki sari dhani thi

uljhan si hone lagti thi mujh ko aksar aur wo yun

mera mizaj-e-ishq tha shahri us ki wafa dahqani thi

ab to us ke bare mein tum jo chaho wo kah Dalo

wo angDai mere kamre tak to baDi ruhani thi

nam pe hum qurban the us ke lekin phir ye taur hua

us ko dekh ke ruk jaana bhi sab se baDi qurbani thi

mujh se bichhaD kar bhi wo laDki kitni KHush KHush rahti hai

us laDki ne mujh se bichhaD kar mar jaane ki Thani thi

ishq ki haalat kuchh bhi nahin thi baat baDhane ka fan tha

lamhe la-fani Thahre the qatron ki tughyani thi

jis ko KHud main ne bhi apni ruh ka irfan samjha tha

wo to shayad mere pyase honTon ki shaitani thi

tha darbar-e-kalan bhi us ka naubat-KHana us ka tha

thi mere dil ki jo rani amrohe ki rani thi