lamha lamha bar hai tere baghair

lamha lamha baar hai tere baġhair

zindagī dushvār hai tere baġhair

dil kī be-tābī kā aalam kyā kahūñ

har nafas talvār hai tere baġhair

majma-e-ahbāb o arbāb-e-vafā

majma-e-aġhyār hai tere baġhair

tujh se barham huuñ kabhī ḳhud se ḳhafā

kuchh ajab raftār hai tere baġhair

zindagī se maut ik ik gaam par

bar-sar-e-paikār hai tere baġhair

ālam-e-furqat meñ zikr-e-ḳhvāb kyā

niiñd ḳhud bedār hai tere baġhair

shām-e-ġham karvaT badaltā hī nahīñ

vaqt bhī ḳhuddār hai tere baġhair

aa masīhā aa ki ab terā 'shakīl'

jaan se be-zār hai tere baġhair

lamha lamha bar hai tere baghair

zindagi dushwar hai tere baghair

dil ki be-tabi ka aalam kya kahun

har nafas talwar hai tere baghair

majma-e-ahbab o arbab-e-wafa

majma-e-aghyar hai tere baghair

tujh se barham hun kabhi KHud se KHafa

kuchh ajab raftar hai tere baghair

zindagi se maut ek ek gam par

bar-sar-e-paikar hai tere baghair

aalam-e-furqat mein zikr-e-KHwab kya

nind KHud bedar hai tere baghair

sham-e-gham karwaT badalta hi nahin

waqt bhi KHuddar hai tere baghair

aa masiha aa ki ab tera 'shakil'

jaan se be-zar hai tere baghair