taron bhari palkon ki barsai hui ghazlen

tāroñ bharī palkoñ kī barsā.ī huī ġhazleñ

hai kaun piro.e jo bikhrā.ī huī ġhazleñ

vo lab haiñ ki do misre aur donoñ barābar ke

zulfeñ ki dil-e-shā.ir par chhā.ī huī ġhazleñ

ye phuul haiñ yā sheroñ ne sūrateñ paa.ī haiñ

shāḳheñ haiñ ki shabnam meñ nahlā.ī huī ġhazleñ

ḳhud apnī hī aahaT par chauñke huuñ hiran jaise

yuuñ raah meñ miltī haiñ ghabrā.ī huī ġhazleñ

in lafzoñ kī chādar ko sarkāo to dekhoge

ehsās ke ghūñghaT meñ sharmā.ī huī ġhazleñ

us jān-e-taġhazzul ne jab bhī kahā kuchh kahiye

maiñ bhuul gayā aksar yaad aa.ī huī ġhazleñ

taron bhari palkon ki barsai hui ghazlen

hai kaun piroe jo bikhrai hui ghazlen

wo lab hain ki do misre aur donon barabar ke

zulfen ki dil-e-shair par chhai hui ghazlen

ye phul hain ya sheron ne suraten pai hain

shaKHen hain ki shabnam mein nahlai hui ghazlen

KHud apni hi aahaT par chaunke hun hiran jaise

yun rah mein milti hain ghabrai hui ghazlen

in lafzon ki chadar ko sarkao to dekhoge

ehsas ke ghunghaT mein sharmai hui ghazlen

us jaan-e-taghazzul ne jab bhi kaha kuchh kahiye

main bhul gaya aksar yaad aai hui ghazlen