tamasha-e-dair-o-haram dekhte hain

tamāshā-e-dair-o-haram dekhte haiñ

tujhe har bahāne se ham dekhte haiñ

hamārī taraf ab vo kam dekhte haiñ

vo nazreñ nahīñ jin ko ham dekhte haiñ

zamāne ke kyā kyā sitam dekhte haiñ

hamīñ jānte haiñ jo ham dekhte haiñ

phire but-kade se to ai ahl-e-ka.aba

phir aa kar tumhāre qadam dekhte haiñ

hameñ chashm-e-bīnā dikhātī hai sab kuchh

vo andhe haiñ jo jām-e-jam dekhte haiñ

na īmā-e-ḳhvāhish na iz.hār-e-matlab

mire muñh ko ahl-e-karam dekhte haiñ

kabhī toḌte haiñ vo ḳhanjar ko apne

kabhī nabz-e-bismil meñ dam dekhte haiñ

ġhanīmat hai chashm-e-taġhāful bhī un kī

bahut dekhte haiñ jo kam dekhte haiñ

ġharaz kyā ki samjheñ mire ḳhat kā mazmūñ

vo unvān o tarz-e-raqam dekhte haiñ

salāmat rahe dil burā hai ki achchhā

hazāroñ meñ ye ek dam dekhte haiñ

rahā kaun mahfil meñ ab aane vaalā

vo chāroñ taraf dam-ba-dam dekhte haiñ

udhar sharm haa.il idhar ḳhauf maane

na vo dekhte haiñ na ham dekhte haiñ

unheñ kyuuñ na ho dilrubā.ī se nafrat

ki har dil meñ vo ġham alam dekhte haiñ

nigahbāñ se bhī kyā huī bad-gumānī

ab us ko tire saath kam dekhte haiñ

hameñ 'dāġh' kyā kam hai ye sarfarāzī

ki shāh-e-dakan ke qadam dekhte haiñ

tamasha-e-dair-o-haram dekhte hain

tujhe har bahane se hum dekhte hain

hamari taraf ab wo kam dekhte hain

wo nazren nahin jin ko hum dekhte hain

zamane ke kya kya sitam dekhte hain

hamin jaante hain jo hum dekhte hain

phire but-kade se to ai ahl-e-kaba

phir aa kar tumhaare qadam dekhte hain

hamein chashm-e-bina dikhati hai sab kuchh

wo andhe hain jo jam-e-jam dekhte hain

na ima-e-KHwahish na izhaar-e-matlab

mere munh ko ahl-e-karam dekhte hain

kabhi toDte hain wo KHanjar ko apne

kabhi nabz-e-bismil mein dam dekhte hain

ghanimat hai chashm-e-taghaful bhi un ki

bahut dekhte hain jo kam dekhte hain

gharaz kya ki samjhen mere KHat ka mazmun

wo unwan o tarz-e-raqam dekhte hain

salamat rahe dil bura hai ki achchha

hazaron mein ye ek dam dekhte hain

raha kaun mahfil mein ab aane wala

wo chaaron taraf dam-ba-dam dekhte hain

udhar sharm hail idhar KHauf mane

na wo dekhte hain na hum dekhte hain

unhen kyun na ho dilrubai se nafrat

ki har dil mein wo gham alam dekhte hain

nigahban se bhi kya hui bad-gumani

ab us ko tere sath kam dekhte hain

hamein 'dagh' kya kam hai ye sarfaraazi

ki shah-e-dakan ke qadam dekhte hain