wo ki har ahd-e-mohabbat se mukarta jae

vo ki har ahd-e-mohabbat se mukartā jaa.e

dil vo zālim ki usī shaḳhs pe martā jaa.e

mere pahlū meñ vo aayā bhī to ḳhushbū kī tarah

maiñ use jitnā sameTūñ vo bikhartā jaa.e

khulte jaa.eñ jo tire band-e-qabā zulf ke saath

rañg-e-pairāhan-e-shab aur nikhartā jaa.e

ishq kī narm-nigāhī se hinā hoñ ruḳhsār

husn vo husn jo dekhe se nikhartā jaa.e

kyuuñ na ham us ko dil-o-jān se chāheñ 'tishna'

vo jo ik dushman-e-jāñ pyaar bhī kartā jaa.e

wo ki har ahd-e-mohabbat se mukarta jae

dil wo zalim ki usi shaKHs pe marta jae

mere pahlu mein wo aaya bhi to KHushbu ki tarah

main use jitna sameTun wo bikharta jae

khulte jaen jo tere band-e-qaba zulf ke sath

rang-e-pairahan-e-shab aur nikharta jae

ishq ki narm-nigahi se hina hon ruKHsar

husn wo husn jo dekhe se nikharta jae

kyun na hum us ko dil-o-jaan se chahen 'tishna'

wo jo ek dushman-e-jaan pyar bhi karta jae