mere sar mein jo raat chakkar tha

mere sar meñ jo raat chakkar thā

us ke zaanū pe ġhair kā sar thā

apne ghar un ko kyā bulāte ham

boriyā bhī nahīñ mayassar thā

zabt-e-dil par bhī us kī mahfil meñ

apnā rūmāl ashk se tar thā

jaan dene meñ soch kyā karte

muflisī par bhī dil tavañgar thā

ḳhūb-o-zisht-e-jahāñ kā farq na pūchh

maut jab aa.ī sab barābar thā

aap jab tak na le chuke the dil

kuchh mizāj aur banda-parvar thā

hijr lāhiq huā visāl ke ba.ad

kyā hī ulTā mirā muqaddar thā

jaur-e-a.adā kī taab kyā laatā

dil-e-kam-baḳht nāz-parvar thā

sohbat-e-hūr se huī nafrat

maiñ jo terī adā kā ḳhūgar thā

hai 'asar' yā nahīñ ḳhudā jaane

sunte haiñ us kā haal abtar thā

mere sar mein jo raat chakkar tha

us ke zanu pe ghair ka sar tha

apne ghar un ko kya bulate hum

boriya bhi nahin mayassar tha

zabt-e-dil par bhi us ki mahfil mein

apna rumal ashk se tar tha

jaan dene mein soch kya karte

muflisi par bhi dil tawangar tha

KHub-o-zisht-e-jahan ka farq na puchh

maut jab aai sab barabar tha

aap jab tak na le chuke the dil

kuchh mizaj aur banda-parwar tha

hijr lahiq hua visal ke baad

kya hi ulTa mera muqaddar tha

jaur-e-ada ki tab kya lata

dil-e-kam-baKHt naz-parwar tha

sohbat-e-hur se hui nafrat

main jo teri ada ka KHugar tha

hai 'asar' ya nahin KHuda jaane

sunte hain us ka haal abtar tha