meri taqdir muafiq na thi tadbir ke sath

merī taqdīr muāfiq na thī tadbīr ke saath

khul ga.ī aañkh nigahbāñ kī bhī zanjīr ke saath

khul gayā mus.haf-e-ruḳhsār-e-butān-e-maġhrib

ho ga.e shaiḳh bhī hāzir na.ī tafsīr ke saath

nā-tavānī mirī dekhī to musavvir ne kahā

Dar hai tum bhī kahīñ khiñch aao na tasvīr ke saath

ho gayā tā.ir-e-dil said-e-nigāh-e-be-qasd

sa.ī-e-bāzū kī yahāñ shart na thī tiir ke saath

lahza lahza hai taraqqī pe tirā husn-o-jamāl

jis ko shak ho tujhe dekhe tirī tasvīr ke saath

ba.ad sayyad ke maiñ collage kā karūñ kyā darshan

ab mohabbat na rahī is but-e-be-pīr ke saath

maiñ huuñ kyā chiiz jo us tarz pe jā.ūñ 'akbar'

'nāsiḳh' o 'zauq' bhī jab chal na sake 'mīr' ke saath

meri taqdir muafiq na thi tadbir ke sath

khul gai aankh nigahban ki bhi zanjir ke sath

khul gaya mushaf-e-ruKHsar-e-butan-e-maghrib

ho gae shaiKH bhi hazir nai tafsir ke sath

na-tawani meri dekhi to musawwir ne kaha

Dar hai tum bhi kahin khinch aao na taswir ke sath

ho gaya tair-e-dil said-e-nigah-e-be-qasd

sai-e-bazu ki yahan shart na thi tir ke sath

lahza lahza hai taraqqi pe tera husn-o-jamal

jis ko shak ho tujhe dekhe teri taswir ke sath

baad sayyad ke main collage ka karun kya darshan

ab mohabbat na rahi is but-e-be-pir ke sath

main hun kya chiz jo us tarz pe jaun 'akbar'

'nasiKH' o 'zauq' bhi jab chal na sake 'mir' ke sath