mila jo kaam gham-e-motabar banane ka

milā jo kaam ġham-e-mo'tabar banāne kā

hunar us aañkh ko aayā na ghar banāne kā

tujhī se ḳhvāb haiñ mere tujhī se bedārī

tujhe salīqa hai shām-o-sahar banāne kā

maiñ apne pīchhe sitāroñ ko chhoḌ aayā huuñ

mujhe dimāġh nahīñ ham-safar banāne kā

ye mere hāthoñ meñ patthar haiñ aur raat hai sard

maiñ kaam letā huuñ un se sharar banāne kā

sarā.e meñ koī ik shab ruke to baat hai aur

magar savāl hai duniyā ko ghar banāne kā

makāñ ke naqshe pe dīvār likh diyā kis ne

yahāñ to merā irāda thā dar banāne kā

ye aur baat ki manzil-fareb thā lekin

hunar vo jāntā thā ham-safar banāne kā

vo log kashtī o sāhil kī fikr kyā karte

jinheñ hai hausla dariyā meñ ghar banāne kā

har ek tuḳhm ko rizq-e-shikam-purī na samajh

hunar bhī siikh zamīñ se shajar banāne kā

bahut tavīl mirī dāstān-e-ġham thī magar

ġhazal se kaam liyā muḳhtasar banāne kā

mila jo kaam gham-e-mo'tabar banane ka

hunar us aankh ko aaya na ghar banane ka

tujhi se KHwab hain mere tujhi se bedari

tujhe saliqa hai sham-o-sahar banane ka

main apne pichhe sitaron ko chhoD aaya hun

mujhe dimagh nahin ham-safar banane ka

ye mere hathon mein patthar hain aur raat hai sard

main kaam leta hun un se sharar banane ka

sarae mein koi ek shab ruke to baat hai aur

magar sawal hai duniya ko ghar banane ka

makan ke naqshe pe diwar likh diya kis ne

yahan to mera irada tha dar banane ka

ye aur baat ki manzil-fareb tha lekin

hunar wo jaanta tha ham-safar banane ka

wo log kashti o sahil ki fikr kya karte

jinhen hai hausla dariya mein ghar banane ka

har ek tuKHm ko rizq-e-shikam-puri na samajh

hunar bhi sikh zamin se shajar banane ka

bahut tawil meri dastan-e-gham thi magar

ghazal se kaam liya muKHtasar banane ka