mila jo mauqa to rok dunga jalal roz-e-hisab tera

milā jo mauqa.a to rok dūñgā 'jalāl' roz-e-hisāb terā

paḌhūñgā rahmat kā vo qasīda ki hañs paḌegā itaab terā

yahī to haiñ do sutūn-e-mahkam inhīñ pe qaa.im hai nazm-e-ālam

yahī to hai rāz-e-ḳhuld-o-ādam nigāh merī shabāb terā

sabā tasadduq tire nafas par chaman tire pairahan pe qurbāñ

nasīm-e-doshīzgī meñ kaisā basā huā hai shabāb terā

tamām mahfil ke rū-ba-rū go uThā.īñ nazreñ milā.īñ āñkheñ

samajh sakā ek bhī na lekin savāl merā javāb terā

hazār shāḳheñ adā se lachkīñ huā na terā sā loch paidā

shafaq ne kitne hī rañg badle milā na rañg-e-shabāb terā

idhar mirā dil taḌap rahā hai tirī javānī kī justujū meñ

udhar mire dil kī aarzū meñ machal rahā hai shabāb terā

karegī donoñ kā chaak parda rahegā donoñ ko kar ke rusvā

ye shorish-e-zauq-e-dīd merī ye ehtimām-e-hijāb terā

jaḌeñ pahāḌoñ kī TuuT jātīñ falak to kyā arsh kaañp uThtā

agar maiñ dil par na rok letā tamām zor-e-shabāb terā

bhalā huā 'josh' ne haTāyā nigāh kā chashm-e-tar se parda

balā se jaatī raheñ gar āñkheñ khulā to band-e-naqāb terā

mila jo mauqa to rok dunga 'jalal' roz-e-hisab tera

paDhunga rahmat ka wo qasida ki hans paDega itab tera

yahi to hain do sutun-e-mahkam inhin pe qaim hai nazm-e-alam

yahi to hai raaz-e-KHuld-o-adam nigah meri shabab tera

saba tasadduq tere nafas par chaman tere pairahan pe qurban

nasim-e-doshizgi mein kaisa basa hua hai shabab tera

tamam mahfil ke ru-ba-ru go uThain nazren milain aankhen

samajh saka ek bhi na lekin sawal mera jawab tera

hazar shaKHen ada se lachkin hua na tera sa loch paida

shafaq ne kitne hi rang badle mila na rang-e-shabab tera

idhar mera dil taDap raha hai teri jawani ki justuju mein

udhar mere dil ki aarzu mein machal raha hai shabab tera

karegi donon ka chaak parda rahega donon ko kar ke ruswa

ye shorish-e-zauq-e-did meri ye ehtimam-e-hijab tera

jaDen pahaDon ki TuT jatin falak to kya arsh kanp uThta

agar main dil par na rok leta tamam zor-e-shabab tera

bhala hua 'josh' ne haTaya nigah ka chashm-e-tar se parda

bala se jati rahen gar aankhen khula to band-e-naqab tera