milta hai har charagh ko saya zamin par

miltā hai har charāġh ko saayā zamīn par

rahtā nahīñ hai koī akelā zamīn par

har ek naqsh us kā havā le ke uḌ ga.ī

khīñchā thā ham ne shauq kā naqsha zamīn par

badle hue se lagte haiñ ab mausamoñ ke rañg

paḌtā hai āsmān kā saayā zamīn par

gosha zarā sā koī amaañ kā kahīñ mile

jī tañg ho gayā hai kushāda zamīn par

har ek mauj ruk sī ga.ī saañs kī tarah

bahtā nahīñ hai ab kahīñ dariyā zamīn par

vo jin ko mere ghar kā nishāñ bhī nahīñ milā

hairāñ haiñ mujh ko dekh ke zinda zamīn par

milta hai har charagh ko saya zamin par

rahta nahin hai koi akela zamin par

har ek naqsh us ka hawa le ke uD gai

khincha tha hum ne shauq ka naqsha zamin par

badle hue se lagte hain ab mausamon ke rang

paDta hai aasman ka saya zamin par

gosha zara sa koi aman ka kahin mile

ji tang ho gaya hai kushada zamin par

har ek mauj ruk si gai sans ki tarah

bahta nahin hai ab kahin dariya zamin par

wo jin ko mere ghar ka nishan bhi nahin mila

hairan hain mujh ko dekh ke zinda zamin par