kya bulbul asir hai be-baal-o-par ki hum

kyā bulbul asiir hai be-bāl-o-par ki ham

gul kab rakhe hai TukḌe jigar is qadar ki ham

ḳhurshīd sub.h nikle hai is nuur se ki to

shabnam girah meñ rakhtī hai ye chashm-e-tar ki ham

jiite haiñ to dikhā deñge dāva-e-andalīb

gul bin ḳhizāñ meñ ab ke vo rahtī hai mar ki ham

ye teġh hai ye tasht hai ye ham haiñ kushtanī

khele hai kaun aisī tarah jaan par ki ham

talvāreñ tum lagāte ho ham haiñge dam-ba-ḳhud

duniyā meñ ye kare hai koī darguzar ki ham

is justujū meñ aur ḳharābī to kyā kaheñ

itnī nahīñ huī hai sabā dar-ba-dar ki ham

jab jā phañsā kahīñ to hameñ yaañ huī ḳhabar

rakhtā hai kaun dil tirī itnī ḳhabar ki ham

jiite haiñ aur rote haiñ laḳht-e-jigar hai 'mīr'

karte sunā hai yuuñ koī qiima jigar ki ham

kya bulbul asir hai be-baal-o-par ki hum

gul kab rakhe hai TukDe jigar is qadar ki hum

KHurshid subh nikle hai is nur se ki to

shabnam girah mein rakhti hai ye chashm-e-tar ki hum

jite hain to dikha denge dawa-e-andalib

gul bin KHizan mein ab ke wo rahti hai mar ki hum

ye tegh hai ye tasht hai ye hum hain kushtani

khele hai kaun aisi tarah jaan par ki hum

talwaren tum lagate ho hum hainge dam-ba-KHud

duniya mein ye kare hai koi darguzar ki hum

is justuju mein aur KHarabi to kya kahen

itni nahin hui hai saba dar-ba-dar ki hum

jab ja phansa kahin to hamein yan hui KHabar

rakhta hai kaun dil teri itni KHabar ki hum

jite hain aur rote hain laKHt-e-jigar hai 'mir'

karte suna hai yun koi qima jigar ki hum