KHat likh ke koi sada na usko malul ho

ḳhat likh ke koī saada na us ko malūl ho

ham to huuñ bad-gumān jo qāsid-e-rasūl ho

chāhūñ to bhar ke kaulī uThā luuñ abhī tumheñ

kaise hī bhārī ho mire aage to phuul ho

surma jo nuur baḳhshe hai āñkhoñ ko ḳhalq kī

shāyad ki rāh-e-yār kī hī ḳhaak dhuul ho

jāveñ nisār hone ko ham kis bisāt par

ik niim jaañ rakheñ haiñ so vo jab qubūl ho

ham in dinoñ meñ lag nahīñ paḌte haiñ sub.h-o-shām

varna du'ā kareñ to jo chāheñ husūl ho

dil le ke lauñDe dillī ke kab kā pachā ga.e

ab un se khaa.ī pī huī shai kyā vasūl ho

nākām is liye ho ki chāho ho sab kuchh aaj

tum bhī to 'mīr' sāhib-o-qibla ajuul ho

KHat likh ke koi sada na us ko malul ho

hum to hun bad-guman jo qasid-e-rasul ho

chahun to bhar ke kauli uTha lun abhi tumhein

kaise hi bhaari ho mere aage to phul ho

surma jo nur baKHshe hai aankhon ko KHalq ki

shayad ki rah-e-yar ki hi KHak dhul ho

jawen nisar hone ko hum kis bisat par

ek nim jaan rakhen hain so wo jab qubul ho

hum in dinon mein lag nahin paDte hain subh-o-sham

warna du'a karen to jo chahen husul ho

dil le ke launDe dilli ke kab ka pacha gae

ab un se khai pi hui shai kya wasul ho

nakaam is liye ho ki chaho ho sab kuchh aaj

tum bhi to 'mir' sahib-o-qibla ajul ho