mera ji hai jab tak teri justuju hai

mirā jī hai jab tak tirī justujū hai

zabāñ jab talak hai yahī guftugū hai

ḳhudā jaane kyā hogā anjām is kā

maiñ be-sabr itnā huuñ vo tund-ḳhū hai

tamannā tirī hai agar hai tamannā

tirī aarzū hai agar aarzū hai

kiyā sair sab ham ne gulzār-e-duniyā

gul-e-dostī meñ ajab rañg-o-bū hai

ġhanīmat hai ye diid va dīd-e-yārāñ

jahāñ aañkh muñd ga.ī na maiñ huuñ na tū hai

nazar mere dil kī paḌī 'dard' kis par

jidhar dekhtā huuñ vahī rū-ba-rū hai

mera ji hai jab tak teri justuju hai

zaban jab talak hai yahi guftugu hai

KHuda jaane kya hoga anjam is ka

main be-sabr itna hun wo tund-KHu hai

tamanna teri hai agar hai tamanna

teri aarzu hai agar aarzu hai

kiya sair sab hum ne gulzar-e-duniya

gul-e-dosti mein ajab rang-o-bu hai

ghanimat hai ye did wa did-e-yaran

jahan aankh mund gai na main hun na tu hai

nazar mere dil ki paDi 'dard' kis par

jidhar dekhta hun wahi ru-ba-ru hai