mere qarib hi mahtab dekh sakta tha

mire qarīb hī mahtāb dekh saktā thā

ga.e dinoñ meñ ye tālāb dekh saktā thā

ik aise vaqt meñ sab peḌ maiñ ne naql kiye

jahāñ pe maiñ inheñ shādāb dekh saktā thā

ziyāda der usī naav meñ Thaharne se

maiñ apne-āp ko ġharqāb dekh saktā thā

koī bhī dil meñ zarā jam ke ḳhaak uḌātā to

hazār gauhar-e-nāyāb dekh saktā thā

kahāniyoñ ne mirī ādateñ bigāḌ dī thiiñ

maiñ sirf sach ko zafar-yāb dekh saktā thā

magar vo shahr kahānī meñ rah gayā hai dost!

jahāñ maiñ rah ke tire ḳhvāb dekh saktā thā

mere qarib hi mahtab dekh sakta tha

gae dinon mein ye talab dekh sakta tha

ek aise waqt mein sab peD main ne naql kiye

jahan pe main inhen shadab dekh sakta tha

ziyaada der usi naw mein Thaharne se

main apne-ap ko gharqab dekh sakta tha

koi bhi dil mein zara jam ke KHak uData to

hazar gauhar-e-nayab dekh sakta tha

kahaniyon ne meri aadaten bigaD di thin

main sirf sach ko zafar-yab dekh sakta tha

magar wo shahr kahani mein rah gaya hai dost!

jahan main rah ke tere KHwab dekh sakta tha