mere sheron mein fankari nahin hai

mire she'roñ meñ fankārī nahīñ hai

ki mujh meñ itnī hushyārī nahīñ hai

davā-e-maut kyuuñ lete ho itnī

agar jiine kī bīmārī nahīñ hai

badan phir se ugā legī ye miTTī

ki maiñ ne jaañ abhī haarī nahīñ hai

mohabbat hai hī itnī sāf-o-sāda

ye merī sahl-añgārī nahīñ hai

ise bachchoñ ke hāthoñ se uThāo

ye duniyā is qadar bhārī nahīñ hai

maiñ us patthar se Takrātā huuñ be-kār

zarā bhī us meñ chingārī nahīñ hai

na kyuuñ sajda kare apne butoñ kā

ye sar masjid kā darbārī nahīñ hai

gayā ye kah ke mujh se 'ishq kā rog

ki tujh ko shauq-e-bīmārī nahīñ hai

hamārā 'ishq karnā jism ke saath

'ibādat hai gunahgārī nahīñ hai

ba-rāh-e-jism hai saarā tasavvuf

badan suufī hai braham-zhārī nahīñ hai

ye koī aur hogā 'farhat-ehsās'

nahīñ ye bhī mirī baarī nahīñ hai

mere she'ron mein fankari nahin hai

ki mujh mein itni hushyari nahin hai

dawa-e-maut kyun lete ho itni

agar jine ki bimari nahin hai

badan phir se uga legi ye miTTi

ki main ne jaan abhi haari nahin hai

mohabbat hai hi itni saf-o-sada

ye meri sahl-angari nahin hai

ise bachchon ke hathon se uThao

ye duniya is qadar bhaari nahin hai

main us patthar se Takraata hun be-kar

zara bhi us mein chingari nahin hai

na kyun sajda kare apne buton ka

ye sar masjid ka darbari nahin hai

gaya ye kah ke mujh se 'ishq ka rog

ki tujh ko shauq-e-bimari nahin hai

hamara 'ishq karna jism ke sath

'ibaadat hai gunahgari nahin hai

ba-rah-e-jism hai sara tasawwuf

badan sufi hai braham-zhaari nahin hai

ye koi aur hoga 'farhat-ehsas'

nahin ye bhi meri bari nahin hai