mere supurd kahan wo KHazana karta tha

mire supurd kahāñ vo ḳhazāna kartā thā

sulūk kartā thā aur ġhā.ebāna kartā thā

ajiib us kī talab thī ajab thā asp-e-savār

ki mulk-o-māl kī parvā zarā na kartā thā

shi.ār-e-zīst hunar thā so ham na jaan sake

jo kaam ham nai kiyā dūsrā na kartā thā

safar-girafta rahe kushtagān-e-nān-o-namak

hamāre haq meñ koī faisla na kartā thā

fazā meñ haath to uTThe the ek saath ka.ī

kisī ke vāste koī duā na kartā thā

tamām sūrat-e-tartīb is ko aatī hai

agarche ḳhair ko shar se judā na kartā thā

vo qalb-gāh-e-tamannā meñ ik charāġh kī lau

ko tez rakhtā thā nazr-e-havā na kartā thā

uThā rakhā thā usī par se e'tibār tamām

aur intizār bhī us kā zamāna kartā thā

unhīñ gharoñ se ibārat hai apnī shām-e-jahāñ

charāġh-e-tāq bhī aksar jalā na kartā thā

mere supurd kahan wo KHazana karta tha

suluk karta tha aur ghaebana karta tha

ajib us ki talab thi ajab tha asp-e-sawar

ki mulk-o-mal ki parwa zara na karta tha

shiar-e-zist hunar tha so hum na jaan sake

jo kaam hum nai kiya dusra na karta tha

safar-girafta rahe kushtagan-e-nan-o-namak

hamare haq mein koi faisla na karta tha

faza mein hath to uTThe the ek sath kai

kisi ke waste koi dua na karta tha

tamam surat-e-tartib is ko aati hai

agarche KHair ko shar se juda na karta tha

wo qalb-gah-e-tamanna mein ek charagh ki lau

ko tez rakhta tha nazr-e-hawa na karta tha

uTha rakha tha usi par se e'tibar tamam

aur intizar bhi us ka zamana karta tha

unhin gharon se ibarat hai apni sham-e-jahan

charagh-e-taq bhi aksar jala na karta tha