meri nazar mera apna mushahida hai kahan

mirī nazar mirā apnā mushāhida hai kahāñ

jo musta.ār nahīñ hai vo zāviya hai kahāñ

agar nahīñ tire jaisā to farq kaisā hai

agar maiñ aks huuñ terā to aa.ina hai kahāñ

huī hai jis meñ vazāhat hamāre hone kī

tirī kitāb meñ āḳhir vo hāshiya hai kahāñ

ye ham-safar to sabhī ajnabī se lagte haiñ

maiñ jis ke saath chalā thā vo qāfila hai kahāñ

madār meñ huuñ agar maiñ to hai kashish kis kī

agar maiñ ḳhud hī kashish huuñ to dā.era hai kahāñ

tirī zamīn pe kartā rahā huuñ mazdūrī

hai sūkhne ko pasīna muāvza hai kahāñ

huā bahisht se be-daḳhl jis ke baa.is maiñ

mirī zabān par us phal kā zā.iqa hai kahāñ

azal se hai mujhe darpesh dā.eroñ kā safar

jo mustaqīm hai yā rab vo rāsta hai kahāñ

agarche is se guzar to rahā huuñ maiñ 'āsim'

ye tajraba bhī mirā apnā tajraba hai kahāñ

meri nazar mera apna mushahida hai kahan

jo mustaar nahin hai wo zawiya hai kahan

agar nahin tere jaisa to farq kaisa hai

agar main aks hun tera to aaina hai kahan

hui hai jis mein wazahat hamare hone ki

teri kitab mein aaKHir wo hashiya hai kahan

ye ham-safar to sabhi ajnabi se lagte hain

main jis ke sath chala tha wo qafila hai kahan

madar mein hun agar main to hai kashish kis ki

agar main KHud hi kashish hun to daera hai kahan

teri zamin pe karta raha hun mazduri

hai sukhne ko pasina muawza hai kahan

hua bahisht se be-daKHl jis ke bais main

meri zaban par us phal ka zaiqa hai kahan

azal se hai mujhe darpesh daeron ka safar

jo mustaqim hai ya rab wo rasta hai kahan

agarche is se guzar to raha hun main 'asim'

ye tajraba bhi mera apna tajraba hai kahan