miTTi ho kar ishq kiya hai ek dariya ki rawani se

miTTī ho kar ishq kiyā hai ik dariyā kī ravānī se

dīvār-o-dar maañg rahā huuñ maiñ bhī bahte paanī se

be-ḳhabarī meñ hoñT diye kī lau ko chūmne vaale the

vo to achānak phuuT paḌī thī ḳhushbū raat kī raanī se

vo majbūrī maut hai jis meñ kaase ko buniyād mile

pyaas kī shiddat jab baḌhtī hai Dar lagtā hai paanī se

duniyā vāloñ ke mansūbe merī samajh meñ aa.e nahīñ

zinda rahnā siikh rahā huuñ ab ghar kī vīrānī se

jaise tere darvāze tak dastak dene pahuñche the

apne ghar bhī lauT ke aate ham itnī āsānī se

ham ko sab ma.alūm hai 'mohsin' haal pas-e-girdāb hai kyā

aañkh ne sachche gur sīkhe haiñ sūraj kī darbānī se

miTTi ho kar ishq kiya hai ek dariya ki rawani se

diwar-o-dar mang raha hun main bhi bahte pani se

be-KHabari mein honT diye ki lau ko chumne wale the

wo to achanak phuT paDi thi KHushbu raat ki rani se

wo majburi maut hai jis mein kase ko buniyaad mile

pyas ki shiddat jab baDhti hai Dar lagta hai pani se

duniya walon ke mansube meri samajh mein aae nahin

zinda rahna sikh raha hun ab ghar ki virani se

jaise tere darwaze tak dastak dene pahunche the

apne ghar bhi lauT ke aate hum itni aasani se

hum ko sab malum hai 'mohsin' haal pas-e-girdab hai kya

aankh ne sachche gur sikhe hain suraj ki darbani se