mizaj puchhte rahte ho mujhse kyon mera

mizāj pūchhte rahte ho mujh se kyoñ merā

ki jab samajh na sake jazb-e-andrūñ merā

vo dekh nok-e-sināñ kī bulandiyoñ kī taraf

sipāh-e-zulm na kar paa.ī sar nigūñ merā

ye ehtijāj ajab hai ḳhilāf-e-teġh-e-sitam

zamīñ meñ jazb nahīñ ho rahā hai ḳhuuñ merā

abhī daraḳht ke saa.e meñ thak ke baiThā hai

hazār raat kā jaagā huā junūñ merā

maiñ lafz-e-vasl ke mafhūm tak ko bhuul gayā

kisī ne chhīn liyā is tarah sukūñ merā

ajab nahīñ hai ki tanhā.ī sher paḌhtī hai

siyāh raat pe chaltā hai jab fusūñ merā

bas ek harf-e-mohabbat kā rabt hai tujh se

vagarna kuchh nahīñ lagtā hai tū bhī yuuñ merā

mizaj puchhte rahte ho mujh se kyon mera

ki jab samajh na sake jazb-e-andrun mera

wo dekh nok-e-sinan ki bulandiyon ki taraf

sipah-e-zulm na kar pai sar nigun mera

ye ehtijaj ajab hai KHilaf-e-tegh-e-sitam

zamin mein jazb nahin ho raha hai KHun mera

abhi daraKHt ke sae mein thak ke baiTha hai

hazar raat ka jaga hua junun mera

main lafz-e-wasl ke mafhum tak ko bhul gaya

kisi ne chhin liya is tarah sukun mera

ajab nahin hai ki tanhai sher paDhti hai

siyah raat pe chalta hai jab fusun mera

bas ek harf-e-mohabbat ka rabt hai tujh se

wagarna kuchh nahin lagta hai tu bhi yun mera