mohabbat ki gawahi apne hone ki KHabar le ja

mohabbat kī gavāhī apne hone kī ḳhabar le jā

jidhar vo shaḳhs rahtā hai mujhe ai dil! udhar le jā

sajī hai bazm-e-shabnam to tabassum kaam aa.egā

ta.āruf phuul kā darpesh hai to chashm-e-tar le jā

añdhere meñ gayā vo raushnī meñ lauT aa.egā

diyā jo dil meñ jaltā hai usī ko baam par le jā

uḌānoñ āsmānoñ āshiyānoñ ke liye tā.ir!

ye par TuuTe hue mere ye meyār-e-nazar le jā

zamānoñ ko uḌāneñ barq ko raftār detā thā

magar mujh se kahā Thahre hue shām-o-sahar le jā

koī muñh pher letā hai to 'qāsir' ab shikāyat kyā

tujhe kis ne kahā thā aa.ine ko toḌ kar le jā

mohabbat ki gawahi apne hone ki KHabar le ja

jidhar wo shaKHs rahta hai mujhe ai dil! udhar le ja

saji hai bazm-e-shabnam to tabassum kaam aaega

taaruf phul ka darpesh hai to chashm-e-tar le ja

andhere mein gaya wo raushni mein lauT aaega

diya jo dil mein jalta hai usi ko baam par le ja

uDanon aasmanon aashiyanon ke liye tair!

ye par TuTe hue mere ye meyar-e-nazar le ja

zamanon ko uDanen barq ko raftar deta tha

magar mujh se kaha Thahre hue sham-o-sahar le ja

koi munh pher leta hai to 'qasir' ab shikayat kya

tujhe kis ne kaha tha aaine ko toD kar le ja