aaj tak bahka nahin bahar se diwana tera

aaj tak bahkā nahīñ bāhar se dīvāna tirā

hausle merī nigāhoñ ke haiñ paimāna tirā

raat bhar shabnam kī āñkhoñ se sahar kī maañg meñ

maiñ jise likhtā rahā vo bhī thā afsāna tirā

ye tire dariyā salāmat ye tire bādal ba-ḳhair

luT rahe haiñ ḳhum pe ḳhum sābit hai mai-ḳhāna tirā

āñsuoñ kī āb-e-jū haa.il hai varna lā.ūñ maiñ

merī nazroñ kā sharar āñkhoñ kā ḳhas-ḳhāna tirā

dil meñ dhaḌkan kī tarah sāñsoñ meñ ḳhushbū kī tarah

ab ḳhayāloñ meñ bhī kab aatā hai vo aanā tirā

avval avval to tamāzat dopahar ke dasht kī

āḳhir āḳhir apnī nazroñ ko jhukā jaanā tirā

reza reza kar ga.ī patthar ko bhī shabnam kī choT

haa.e kis dil se magar vo mujh ko samjhānā tirā

aaj tak bahka nahin bahar se diwana tera

hausle meri nigahon ke hain paimana tera

raat bhar shabnam ki aankhon se sahar ki mang mein

main jise likhta raha wo bhi tha afsana tera

ye tere dariya salamat ye tere baadal ba-KHair

luT rahe hain KHum pe KHum sabit hai mai-KHana tera

aansuon ki aab-e-ju hail hai warna laun main

meri nazron ka sharar aankhon ka KHas-KHana tera

dil mein dhaDkan ki tarah sanson mein KHushbu ki tarah

ab KHayalon mein bhi kab aata hai wo aana tera

awwal awwal to tamazat dopahar ke dasht ki

aaKHir aaKHir apni nazron ko jhuka jaana tera

reza reza kar gai patthar ko bhi shabnam ki choT

hae kis dil se magar wo mujh ko samjhana tera