hum hain ai yar chaDhae hue paimana-e-ishq

ham haiñ ai yaar chaḌhā.e hue paimāna-e-ishq

tire matvāle haiñ mash.hūr haiñ mastāna-e-ishq

dushmanoñ meñ bhī rahā rabt-e-mohabbat barsoñ

ḳhush na aayā kasī ma.ashūq ko yārāna-e-ishq

mujh ko jo chaah mohabbat kī hai majnūñ ko kahāñ

us ko lailā hī kā saudā hai maiñ dīvāna-e-ishq

jaan leñge ki vo dil leñge jinheñ chāhā hai

dekhiye karte haiñ kyā aa ke vo jurmāna-e-ishq

jā-ba-jā chāhne vāloñ kā jo majma.a dekhā

kūcha-e-yār ko samjhā maiñ jilau-ḳhāna-e-ishq

sāl-hā-sāl se ḳhush-bāsh jo huuñ sahrā meñ

ālam-e-hū ko samajhtā huuñ maiñ vīrāna-e-ishq

dil pisā chāhtā hai jā ke hinā par us kī

ḳhirman-e-husn huā chāhtā hai dāna-e-ishq

dil kā hai qasd tirī bazm meñ aḌ kar jā.ūñ

kyā hī be-par kī uḌātā hai ye parvāna-e-ishq

har parī-zād kī hai jalva-numā ik tasvīr

shīsha-e-dil hai hamārā ki parī-ḳhāna-e-ishq

dil mirā ḳhaas makāñ hai jo tirī ulfat kā

kahtī hai saarī ḳhudā.ī ise kāshāna-e-ishq

kaun kis kā shab-e-me.arāj meñ hogā ma.ashūq

kī hai kis shoḳh ne ye mahfil-e-shāhāna-e-ishq

tū kare naaz tujhe yaar zamāna chāhe

tā-abad ye rahe ābād tirā ḳhāna-e-ishq

us parī-rū ne jo dekhā mire dil ko sad-chāk

apnī zulfoñ meñ kiyā nām-e-havā shāna-e-ishq

ālam-e-nūr tirī shakl kā parvāna hai

husn kī jaan hai tū aur hai jānāna-e-ishq

sar-ba-kaf ganj-e-shahīdāñ meñ chale jaate haiñ

imtihāñ se nahīñ Darte tire farzāna-e-ishq

naza.a meñ sūra-e-yūsuf koī lillāh paḌhe

dam bhī nikle to marūñ sun ke maiñ afsāna-e-ishq

DabDabā.īñ mirī āñkheñ to vo kyā kahte haiñ

dekho labrez haiñ chhalkeñge ye paimāna-e-ishq

ai 'sharaf' kaun mire dil ke muqābil hogā

ik yahī saarī ḳhudā.ī meñ hai mardāna-e-ishq

hum hain ai yar chaDhae hue paimana-e-ishq

tere matwale hain mashhur hain mastana-e-ishq

dushmanon mein bhi raha rabt-e-mohabbat barson

KHush na aaya kasi mashuq ko yarana-e-ishq

mujh ko jo chah mohabbat ki hai majnun ko kahan

us ko laila hi ka sauda hai main diwana-e-ishq

jaan lenge ki wo dil lenge jinhen chaha hai

dekhiye karte hain kya aa ke wo jurmana-e-ishq

ja-ba-ja chahne walon ka jo majma dekha

kucha-e-yar ko samjha main jilau-KHana-e-ishq

sal-ha-sal se KHush-bash jo hun sahra mein

aalam-e-hu ko samajhta hun main virana-e-ishq

dil pisa chahta hai ja ke hina par us ki

KHirman-e-husn hua chahta hai dana-e-ishq

dil ka hai qasd teri bazm mein aD kar jaun

kya hi be-par ki uData hai ye parwana-e-ishq

har pari-zad ki hai jalwa-numa ek taswir

shisha-e-dil hai hamara ki pari-KHana-e-ishq

dil mera KHas makan hai jo teri ulfat ka

kahti hai sari KHudai ise kashana-e-ishq

kaun kis ka shab-e-mearaj mein hoga mashuq

ki hai kis shoKH ne ye mahfil-e-shahana-e-ishq

tu kare naz tujhe yar zamana chahe

ta-abad ye rahe aabaad tera KHana-e-ishq

us pari-ru ne jo dekha mere dil ko sad-chaak

apni zulfon mein kiya nam-e-hawa shana-e-ishq

aalam-e-nur teri shakl ka parwana hai

husn ki jaan hai tu aur hai jaanana-e-ishq

sar-ba-kaf ganj-e-shahidan mein chale jate hain

imtihan se nahin Darte tere farzana-e-ishq

naza mein sura-e-yusuf koi lillah paDhe

dam bhi nikle to marun sun ke main afsana-e-ishq

DabDabain meri aankhen to wo kya kahte hain

dekho labrez hain chhalkenge ye paimana-e-ishq

ai 'sharaf' kaun mere dil ke muqabil hoga

ek yahi sari KHudai mein hai mardana-e-ishq