mudawa habs ka hone laga aahista aahista

mudāvā habs kā hone lagā āhista āhista

chalī aatī hai vo mauj-e-sabā āhista āhista

zarā vaqfa se niklegā magar niklegā chāñd āḳhir

ki sūraj bhī to maġhrib meñ chhupā āhista āhista

koī suntā to ik kohrām barpā thā havāoñ meñ

shajar se ek pattā jab girā āhista āhista

abhī se harf-e-ruḳhsat kyuuñ jab aadhī raat baaqī hai

gul o shabnam to hote haiñ judā āhista āhista

mujhe manzūr gar tark-e-ta'alluq hai razā terī

magar TūTegā rishta dard kā āhista āhista

phir is ke baad shab hai jis kī had sub.h-e-abad tak hai

muġhannī shaam kā naġhma sunā āhista āhista

shab-e-furqat meñ jab najm-e-sahar bhī Duub jaate haiñ

utartā hai mire dil meñ ḳhudā āhista āhista

maiñ shahr-e-dil se niklā huuñ sab āvāzoñ ko dafnā kar

'nadīm' ab kaun detā hai sadā āhista āhista

mudawa habs ka hone laga aahista aahista

chali aati hai wo mauj-e-saba aahista aahista

zara waqfa se niklega magar niklega chand aaKHir

ki suraj bhi to maghrib mein chhupa aahista aahista

koi sunta to ek kohram barpa tha hawaon mein

shajar se ek patta jab gira aahista aahista

abhi se harf-e-ruKHsat kyun jab aadhi raat baqi hai

gul o shabnam to hote hain juda aahista aahista

mujhe manzur gar tark-e-ta'alluq hai raza teri

magar TuTega rishta dard ka aahista aahista

phir is ke baad shab hai jis ki had subh-e-abad tak hai

mughanni sham ka naghma suna aahista aahista

shab-e-furqat mein jab najm-e-sahar bhi Dub jate hain

utarta hai mere dil mein KHuda aahista aahista

main shahr-e-dil se nikla hun sab aawazon ko dafna kar

'nadim' ab kaun deta hai sada aahista aahista