mujhko mere nasib ne roz-e-azal se kya diya

mujh ko mire nasīb ne roz-e-azal se kyā diyā

daulat-e-do-jahāñ na dī ik dil-e-mubtalā diyā

dil hī nigāh-e-nāz kā ek adā-shanās thā

jalva-e-barq-e-tūr ne tuur ko kyuuñ jalā diyā

qabr meñ jab kisī tarah dil kī taḌap na kam huī

yād-e-ḳhirām-e-nāz ne hashr kā aasrā diyā

roz-e-jazā gila to kyā shukr-e-sitam hī ban paḌā

haa.e ki dil ke dard ne dard ko dil banā diyā

ab mirī laash par huzūr maut ko koste to haiñ

aap ko ye bhī hosh hai kis ne kise miTā diyā

dil meñ samā ke phir ga.ī aas bañdhā ke phir ga.ī

aaj nigāh-e-dost ne kaaba banā ke Dhā diyā

uf ki gunāhgār ham haiñ to magar ḳhatā muaaf

aaTh pahar ke dard ne dil hī to hai dukhā diyā

aap ham apnī aag meñ ai ġham-e-ishq jal bujhe

aag lage is aag ko phūñk diyā jalā diyā

yuuñ na kisī tarah kaTī jab mirī zindagī kī raat

chheḌ ke dāstān-e-ġham dil ne mujhe sulā diyā

girya-e-ātshīñ kī daad de shab-e-ġham to kaun de

ḳhud sar-e-shām kyā bujhī sham.a ne dil bujhā diyā

yaas ne dard hī nahīñ haq to ye hai davā bhī dī

'fānī'-e-nā-umīd ko maut kā aasrā diyā

mujh ko mere nasib ne roz-e-azal se kya diya

daulat-e-do-jahan na di ek dil-e-mubtala diya

dil hi nigah-e-naz ka ek ada-shanas tha

jalwa-e-barq-e-tur ne tur ko kyun jala diya

qabr mein jab kisi tarah dil ki taDap na kam hui

yaad-e-KHiram-e-naz ne hashr ka aasra diya

roz-e-jaza gila to kya shukr-e-sitam hi ban paDa

hae ki dil ke dard ne dard ko dil bana diya

ab meri lash par huzur maut ko koste to hain

aap ko ye bhi hosh hai kis ne kise miTa diya

dil mein sama ke phir gai aas bandha ke phir gai

aaj nigah-e-dost ne kaba bana ke Dha diya

uf ki gunahgar hum hain to magar KHata muaf

aaTh pahar ke dard ne dil hi to hai dukha diya

aap hum apni aag mein ai gham-e-ishq jal bujhe

aag lage is aag ko phunk diya jala diya

yun na kisi tarah kaTi jab meri zindagi ki raat

chheD ke dastan-e-gham dil ne mujhe sula diya

girya-e-atshin ki dad de shab-e-gham to kaun de

KHud sar-e-sham kya bujhi shama ne dil bujha diya

yas ne dard hi nahin haq to ye hai dawa bhi di

'fani'-e-na-umid ko maut ka aasra diya