mujhko to maraz hai be-KHudi ka

mujh ko to maraz hai be-ḳhudī kā

zāhid ko gumān hai mai-kashī kā

har rañg hai tere aage phīkā

mahtāb hai phuul chāñdnī kā

chal jā.egā kaam kuchh kisī kā

muñh muḌ na gayā agar chhurī kā

har vaqt haiñ maut kī duā.eñ

allāh re lutf zindagī kā

ā.īna banā rahe ho dil ko

dil TuuT na jaa.e aarsī kā

ham kahte the juuḌe meñ nahīñ phuul

āḳhir niklā vo dil kisī kā

kahiye abhī ik adā pe kaT jaa.eñ

dam dekhte the faqat chhurī kā

miTtī nahīñ dushmanī kisī kī

rañg us meñ hai merī dostī kā

bose ko jagah milī laboñ par

ab rañg jamegā kyā misī kā

pyāre pyāre the phuul se hoñTh

dhabbā ye burā lagā misī kā

iThlā iThlā ke un ko chalnā

miT jaa.e balā se dil kisī kā

paate haiñ jo mujh ko jī se bezār

kahte haiñ maza hai āshiqī kā

hoñ ek se sab hasīn kyūñkar

hai rañg judā kalī kalī kā

pahle to the mahv-e-dīd muusā

ab lete maza haiñ be-ḳhudī kā

samjhe the na ham ko tum pe marnā

ho jā.egā rog zindagī kā

shoḳhī mazmūn kī le uḌī hai

aalam hai sher meñ parī kā

khīñcheñ jo vo tiir dil bhī de saath

haq kuchh to adā ho dostī kā

naale bulbul ke the ki chhuriyāñ

dil TukḌe huā kalī kalī kā

uThne na diyā kisī ke dar se

ehsān hai mujh pe lāġharī kā

phūloñ se kaho ki rotī hai os

ab is se maza nahīñ hañsī kā

kahte the na ham 'jalīl' tum se

anjām burā hai dil-lagī kā

mujh ko to maraz hai be-KHudi ka

zahid ko guman hai mai-kashi ka

har rang hai tere aage phika

mahtab hai phul chandni ka

chal jaega kaam kuchh kisi ka

munh muD na gaya agar chhuri ka

har waqt hain maut ki duaen

allah re lutf zindagi ka

aaina bana rahe ho dil ko

dil TuT na jae aarsi ka

hum kahte the juDe mein nahin phul

aaKHir nikla wo dil kisi ka

kahiye abhi ek ada pe kaT jaen

dam dekhte the faqat chhuri ka

miTti nahin dushmani kisi ki

rang us mein hai meri dosti ka

bose ko jagah mili labon par

ab rang jamega kya misi ka

pyare pyare the phul se honTh

dhabba ye bura laga misi ka

iThla iThla ke un ko chalna

miT jae bala se dil kisi ka

pate hain jo mujh ko ji se bezar

kahte hain maza hai aashiqi ka

hon ek se sab hasin kyunkar

hai rang juda kali kali ka

pahle to the mahw-e-did musa

ab lete maza hain be-KHudi ka

samjhe the na hum ko tum pe marna

ho jaega rog zindagi ka

shoKHi mazmun ki le uDi hai

aalam hai sher mein pari ka

khinchen jo wo tir dil bhi de sath

haq kuchh to ada ho dosti ka

nale bulbul ke the ki chhuriyan

dil TukDe hua kali kali ka

uThne na diya kisi ke dar se

ehsan hai mujh pe laghari ka

phulon se kaho ki roti hai os

ab is se maza nahin hansi ka

kahte the na hum 'jalil' tum se

anjam bura hai dil-lagi ka