mujhe kyun na aawe saqi nazar aaftab ulTa

mujhe kyuuñ na aave saaqī nazar āftāb ulTā

ki paḌā hai aaj ḳhum meñ qadah-e-sharāb ulTā

ajab ulTe mulk ke haiñ ajī aap bhī ki tum se

kabhī baat kī jo sīdhī to milā javāb ulTā

chale the haram ko rah meñ hue ik sanam ke āshiq

na huā savāb hāsil ye milā azaab ulTā

ye shab-e-guzishta dekhā vo ḳhafā se kuchh haiñ goyā

kaheñ haq kare ki hove ye hamārā ḳhvāb ulTā

abhī jhaḌ lagā de bārish koī mast baḌh ke na.ara

jo zamīn pe pheñk maare qadah-e-sharāb ulTā

ye ajiib mājrā hai ki ba-roz-e-īd-e-qurbāñ

vahī zab.h bhī kare hai vahī le savāb ulTā

yūñhī va.ada par jo jhūTe to nahīñ milāte tevar

ai lo aur bhī tamāshā ye suno javāb ulTā

khaḌe chup ho dekhte kyā mire dil ujaḌ ga.e ko

vo gunah to kah do jis se ye dah-e-ḳharāb ulTā

ġhazal aur qāfiyoñ meñ na kahī so kyūñki 'inshā'

ki havā ne ḳhud-baḳhud aa varaq-e-kitāb ulTā

mujhe kyun na aawe saqi nazar aaftab ulTa

ki paDa hai aaj KHum mein qadah-e-sharab ulTa

ajab ulTe mulk ke hain aji aap bhi ki tum se

kabhi baat ki jo sidhi to mila jawab ulTa

chale the haram ko rah mein hue ek sanam ke aashiq

na hua sawab hasil ye mila azab ulTa

ye shab-e-guzishta dekha wo KHafa se kuchh hain goya

kahen haq kare ki howe ye hamara KHwab ulTa

abhi jhaD laga de barish koi mast baDh ke nara

jo zamin pe phenk mare qadah-e-sharab ulTa

ye ajib majra hai ki ba-roz-e-id-e-qurban

wahi zabh bhi kare hai wahi le sawab ulTa

yunhi wada par jo jhuTe to nahin milate tewar

ai lo aur bhi tamasha ye suno jawab ulTa

khaDe chup ho dekhte kya mere dil ujaD gae ko

wo gunah to kah do jis se ye dah-e-KHarab ulTa

ghazal aur qafiyon mein na kahi so kyunki 'insha'

ki hawa ne KHud-baKHud aa waraq-e-kitab ulTa