murjha ke kali jhil mein girte hue bhi dekh

murjhā ke kaalī jhiil meñ girte hue bhī dekh

sūraj huuñ merā rang magar din-Dhale bhī dekh

kāġhaz kī katranoñ ko bhī kahte haiñ log phuul

rangoñ kā e'tibār hī kyā sūñgh ke bhī dekh

har chand raakh ho ke bikharnā hai raah meñ

jalte hue paroñ se uḌā huuñ mujhe bhī dekh

dushman hai raat phir bhī hai din se milī huī

sub.hoñ ke darmiyān haiñ jo fāsle bhī dekh

'ālam meñ jis kī dhuum thī us shāhkār par

dīmak ne jo likhe kabhī vo tabsire bhī dekh

tū ne kahā na thā ki maiñ kashtī pe bojh huuñ

āñkhoñ ko ab na Dhāñp mujhe Dūbte bhī dekh

us kī shikast ho na kahīñ terī bhī shikast

ye aa.ina jo TuuT gayā hai ise bhī dekh

tū hī barahna-pā nahīñ is jaltī ret par

talvoñ meñ jo havā ke haiñ vo aable bhī dekh

bichhtī thiiñ jis kī raah meñ phūloñ kī chādareñ

ab us kī ḳhaak ghaas ke pairoñ-tale bhī dekh

kyā shāḳh-e-bā-samar hai jo taktā hai farsh ko

nazreñ uThā 'shakeb' kabhī sāmne bhī dekh

murjha ke kali jhil mein girte hue bhi dekh

suraj hun mera rang magar din-Dhale bhi dekh

kaghaz ki katranon ko bhi kahte hain log phul

rangon ka e'tibar hi kya sungh ke bhi dekh

har chand rakh ho ke bikharna hai rah mein

jalte hue paron se uDa hun mujhe bhi dekh

dushman hai raat phir bhi hai din se mili hui

subhon ke darmiyan hain jo fasle bhi dekh

'alam mein jis ki dhum thi us shahkar par

dimak ne jo likhe kabhi wo tabsire bhi dekh

tu ne kaha na tha ki main kashti pe bojh hun

aankhon ko ab na Dhanp mujhe Dubte bhi dekh

us ki shikast ho na kahin teri bhi shikast

ye aaina jo TuT gaya hai ise bhi dekh

tu hi barahna-pa nahin is jalti ret par

talwon mein jo hawa ke hain wo aable bhi dekh

bichhti thin jis ki rah mein phulon ki chadaren

ab us ki KHak ghas ke pairon-tale bhi dekh

kya shaKH-e-ba-samar hai jo takta hai farsh ko

nazren uTha 'shakeb' kabhi samne bhi dekh