mushkil hai ki ab shahr mein nikle koi ghar se

mushkil hai ki ab shahr meñ nikle koī ghar se

dastār pe baat aa ga.ī hotī huī sar se

barsā bhī to kis dasht ke be-faiz badan par

ik umr mire khet the jis abr ko tarse

kal raat jo īñdhan ke liye kaT ke girā hai

chiḌiyoñ ko baḌā pyaar thā us būḌhe shajar se

mehnat mirī āñdhī se to mansūb nahīñ thī

rahnā thā koī rabt shajar kā bhī samar se

ḳhud apne se milne kā to yaarā na thā mujh meñ

maiñ bhiiḌ meñ gum ho ga.ī tanhā.ī ke Dar se

be-nām masāfat hī muqaddar hai to kyā ġham

manzil kā ta.ayyun kabhī hotā hai safar se

pathrāyā hai dil yuuñ ki koī ism paḌhā jaa.e

ye shahr nikaltā nahīñ jaadū ke asar se

nikle haiñ to raste meñ kahīñ shaam bhī hogī

sūraj bhī magar aa.egā is rahguzar se

mushkil hai ki ab shahr mein nikle koi ghar se

dastar pe baat aa gai hoti hui sar se

barsa bhi to kis dasht ke be-faiz badan par

ek umr mere khet the jis abr ko tarse

kal raat jo indhan ke liye kaT ke gira hai

chiDiyon ko baDa pyar tha us buDhe shajar se

mehnat meri aandhi se to mansub nahin thi

rahna tha koi rabt shajar ka bhi samar se

KHud apne se milne ka to yara na tha mujh mein

main bhiD mein gum ho gai tanhai ke Dar se

be-nam masafat hi muqaddar hai to kya gham

manzil ka tayyun kabhi hota hai safar se

pathraya hai dil yun ki koi ism paDha jae

ye shahr nikalta nahin jadu ke asar se

nikle hain to raste mein kahin sham bhi hogi

suraj bhi magar aaega is rahguzar se