mustaqil rone se dil ki be-kali baDh jaegi

mustaqil rone se dil kī be-kalī baḌh jā.egī

bārisheñ hotī rahīñ to ye nadī baḌh jā.egī

ishq kī rāhoñ meñ haa.el ho rahī hai āgahī

ab junūñ baḌh jā.egā dīvāngī baḌh jā.egī

har ghaḌī terā tasavvur har nafas terā ḳhayāl

is tarah to aur bhī terī kamī baḌh jā.egī

ho sake to is hisār-e-zāt se bāhar nikal

habs meñ rahne se vahshat aur bhī baḌh jā.egī

us ne sūraj ke muqābil rakh diye apne charāġh

vo ye samjhā is tarah kuchh raushnī baḌh jā.egī

ishq ke tanhā safar meñ koī saaya DhūñD le

dhuup meñ chaltā rahā to tishnagī baḌh jā.egī

tū hamesha māñgtā rahtā hai kyuuñ ġham se najāt

ġham nahīñ hoñge to kyā terī ḳhushī baḌh jā.egī

ho sake to ham pe zāhir kar de apne dil kā haal

sochte rahne se to sanjīdgī baḌh jā.egī

apnī tanhā.ī meñ kis se guftugū kartā hai tū

in sadāoñ se to shab kī ḳhāmushī baḌh jā.egī

kyā pata thā raat bhar yuuñ jāgnā paḌ jā.egā

ik diyā bujhte hī itnī tīrgī baḌh jā.egī

mustaqil rone se dil ki be-kali baDh jaegi

barishen hoti rahin to ye nadi baDh jaegi

ishq ki rahon mein hael ho rahi hai aagahi

ab junun baDh jaega diwangi baDh jaegi

har ghaDi tera tasawwur har nafas tera KHayal

is tarah to aur bhi teri kami baDh jaegi

ho sake to is hisar-e-zat se bahar nikal

habs mein rahne se wahshat aur bhi baDh jaegi

us ne suraj ke muqabil rakh diye apne charagh

wo ye samjha is tarah kuchh raushni baDh jaegi

ishq ke tanha safar mein koi saya DhunD le

dhup mein chalta raha to tishnagi baDh jaegi

tu hamesha mangta rahta hai kyun gham se najat

gham nahin honge to kya teri KHushi baDh jaegi

ho sake to hum pe zahir kar de apne dil ka haal

sochte rahne se to sanjidgi baDh jaegi

apni tanhai mein kis se guftugu karta hai tu

in sadaon se to shab ki KHamushi baDh jaegi

kya pata tha raat bhar yun jagna paD jaega

ek diya bujhte hi itni tirgi baDh jaegi