mund kar aankhen talash-e-bahr-o-bar karne lage

muuñd kar āñkheñ talāsh-e-bahr-o-bar karne lage

log apnī zaat ke andar safar karne lage

māñjhiyoñ ke giit sun kar aa gayā dariyā ko josh

sāhiloñ pe raqs tezī se bhañvar karne lage

baḌh gayā hai is qadar ab surḳh-rū hone kā shauq

log apne ḳhuun se jismoñ ko tar karne lage

bāñdh de shāḳhoñ se tū miTTī ke phal kāġhaz ke phuul

ye taqāzā raah meñ ujḌe shajar karne lage

gaañv meñ kachche gharoñ kī qīmateñ baḌhne lagīñ

shahr se naql-e-makānī ahl-e-zar karne lage

jaise har chehre kī āñkheñ sar ke pīchhe aa lagīñ

sab ke sab ulTe hī qadmoñ se safar karne lage

ab paḌhe-likkhe bhī 'sājid' aa ke bekārī se tañg

shab ko dīvāroñ pe chaspāñ poster karne lage

mund kar aankhen talash-e-bahr-o-bar karne lage

log apni zat ke andar safar karne lage

manjhiyon ke git sun kar aa gaya dariya ko josh

sahilon pe raqs tezi se bhanwar karne lage

baDh gaya hai is qadar ab surKH-ru hone ka shauq

log apne KHun se jismon ko tar karne lage

bandh de shaKHon se tu miTTi ke phal kaghaz ke phul

ye taqaza rah mein ujDe shajar karne lage

ganw mein kachche gharon ki qimaten baDhne lagin

shahr se naql-e-makani ahl-e-zar karne lage

jaise har chehre ki aankhen sar ke pichhe aa lagin

sab ke sab ulTe hi qadmon se safar karne lage

ab paDhe-likkhe bhi 'sajid' aa ke bekari se tang

shab ko diwaron pe chaspan poster karne lage