na chheD shair rabab-e-rangin ye bazm abhi nukta-dan nahin hai

na chheḌ shā.ir rabāb-e-rañgīñ ye bazm abhī nukta-dāñ nahīñ hai

tirī navā-sanjiyoñ ke shāyāñ fazā-e-hindostāñ nahīñ hai

tirī samā.at nigār-e-fitrat ke lahn kī rāz-dāñ nahīñ hai

vagarna zarra hai kaun aisā ki jis ke muñh meñ zabāñ nahīñ hai

agarche pāmāl haiñ ye bahreñ magar suḳhan hai buland hamdam

na dil meñ laanā gumān-e-pastī mirī zamīñ āsmāñ nahīñ hai

zamīr-e-fitrat meñ pur-fishāñ hai chaman kī tartīb-e-nau kā armāñ

ḳhizāñ jise to samajh rahā hai vo dar-haqīqat ḳhizāñ nahīñ hai

harīm-e-anvār-e-sarmadī hai har ek zarra ba-rabb-e-kāba

mirā ye ainī mushāheda hai fareb-e-vahm-o-gumāñ nahīñ hai

har ek kāñTe pe surḳh kirneñ har ik kalī meñ charāġh raushan

ḳhayāl meñ muskurāne vaale tirā tabassum kahāñ nahīñ hai

falak se hañgām-e-sher-goī sadā.eñ paiham ye aa rahī haiñ

ki aaj ai 'josh' nukta-parvar tirā sā jaadū bayāñ nahīñ hai

na chheD shair rabab-e-rangin ye bazm abhi nukta-dan nahin hai

teri nawa-sanjiyon ke shayan faza-e-hindostan nahin hai

teri samaat nigar-e-fitrat ke lahn ki raaz-dan nahin hai

wagarna zarra hai kaun aisa ki jis ke munh mein zaban nahin hai

agarche pamal hain ye bahren magar suKHan hai buland hamdam

na dil mein lana guman-e-pasti meri zamin aasman nahin hai

zamir-e-fitrat mein pur-fishan hai chaman ki tartib-e-nau ka arman

KHizan jise to samajh raha hai wo dar-haqiqat KHizan nahin hai

harim-e-anwar-e-sarmadi hai har ek zarra ba-rabb-e-kaba

mera ye aini mushaheda hai fareb-e-wahm-o-guman nahin hai

har ek kanTe pe surKH kirnen har ek kali mein charagh raushan

KHayal mein muskurane wale tera tabassum kahan nahin hai

falak se hangam-e-sher-goi sadaen paiham ye aa rahi hain

ki aaj ai 'josh' nukta-parwar tera sa jadu bayan nahin hai