na nikla munh se kuchh nikli na kuchh bhi qalb-e-muztar ki

na niklā muñh se kuchh niklī na kuchh bhī qalb-e-muztar kī

kisī ke sāmne maiñ ban gayā tasvīr patthar kī

ḳhudā se kyuuñ na māñgūñ vaah maiñ bandoñ se kyā māñgūñ

mujhe mil jā.egī jo chiiz hai mere muqaddar kī

tasavvur chāhiye ai shaiḳh sab kā ek iimā hai

sadā hai parda-e-nāqūs meñ allāhu-akbar kī

dil-e-rāhat-talab ko qabr meñ kyā be-qarārī hai

mujhe ghabrā.e detī hai udāsī is na.e ghar kī

kaleje meñ hazāroñ daaġh dil meñ hasrateñ lākhoñ

kamā.ī le chalā huuñ saath apne zindagī bhar kī

sambhal kar dekhnā ārā.ishoñ ke baad ā.īna

ye ā.īna nahīñ hai ab ye TukḌe hai barābar kī

mire ash.ār 'shā.ir' daaġh o aasif jaah se pūchho

ki shaah o jauhrī hī jānte haiñ qadr gauhar kī

na nikla munh se kuchh nikli na kuchh bhi qalb-e-muztar ki

kisi ke samne main ban gaya taswir patthar ki

KHuda se kyun na mangun wah main bandon se kya mangun

mujhe mil jaegi jo chiz hai mere muqaddar ki

tasawwur chahiye ai shaiKH sab ka ek ima hai

sada hai parda-e-naqus mein allahu-akbar ki

dil-e-rahat-talab ko qabr mein kya be-qarari hai

mujhe ghabrae deti hai udasi is nae ghar ki

kaleje mein hazaron dagh dil mein hasraten lakhon

kamai le chala hun sath apne zindagi bhar ki

sambhal kar dekhna aaraishon ke baad aaina

ye aaina nahin hai ab ye TukDe hai barabar ki

mere ashaar 'shair' dagh o aasif jah se puchho

ki shah o jauhri hi jaante hain qadr gauhar ki