na paimane khanakte hain na daur-e-jam chalta hai

na paimāne khanakte haiñ na daur-e-jām chaltā hai

na.ī duniyā ke rindoñ meñ ḳhudā kā naam chaltā hai

ġham-e-ishq se haiñ ġham-e-hastī ke hañgāme judā lekin

vahāñ bhī din guzarte haiñ yahāñ bhī kaam chaltā hai

chhupe haiñ laakh haq ke marhale gum-nām hoñToñ par

usī kī baat chal jaatī hai jis kā naam chaltā hai

junūn-e-rah-ravī-e-vaqt kī raftār se pūchho

koī manzil nahīñ lekin ye sub.h o shaam chaltā hai

'shakīl'-e-mast ko mastī meñ jo kahnā hai kahne do

ye mai-ḳhāna hai ai vaa.iz yahāñ sab kaam chaltā hai

na paimane khanakte hain na daur-e-jam chalta hai

nai duniya ke rindon mein KHuda ka nam chalta hai

gham-e-ishq se hain gham-e-hasti ke hangame juda lekin

wahan bhi din guzarte hain yahan bhi kaam chalta hai

chhupe hain lakh haq ke marhale gum-nam honTon par

usi ki baat chal jati hai jis ka nam chalta hai

junun-e-rah-rawi-e-waqt ki raftar se puchho

koi manzil nahin lekin ye subh o sham chalta hai

'shakil'-e-mast ko masti mein jo kahna hai kahne do

ye mai-KHana hai ai waiz yahan sab kaam chalta hai