nale majburon ke Khaali nahin jaane wale

naale majbūroñ ke ḳhālī nahīñ jaane vaale

haiñ ye sotā huā insāf jagāne vaale

had se Takrātī hai jo shai vo palaTtī hai zarūr

ḳhud bhī ro.eñge ġharīboñ ko rulāne vaale

chup hai parvāna to kyā sham.a ko ḳhud hai iqrār

aap hī jalte haiñ auroñ ko jalāne vaale

'ārzū' zikr zabānoñ pe hai ibrat ke liye

miTne vaale haiñ na baaqī haiñ miTāne vaale

nale majburon ke KHali nahin jaane wale

hain ye sota hua insaf jagane wale

had se Takraati hai jo shai wo palaTti hai zarur

KHud bhi roenge gharibon ko rulane wale

chup hai parwana to kya shama ko KHud hai iqrar

aap hi jalte hain auron ko jalane wale

'arzu' zikr zabanon pe hai ibrat ke liye

miTne wale hain na baqi hain miTane wale