naujawani ki did kar lije

naujavānī kī diid kar liije

apne mausam kī iid kar liije

kaun kahtā hai kaun suntā hai

apnī guft-o-shunīd kar liije

ab ke bichhḌe miloge phir ki nahīñ

kuchh to vā'da va.ii.d kar liije

apne gesū darāz ke mujh ko

silsile meñ murīd kar liije

hai masal ek naah sad āsān

yaas hī ko umiid kar liije

haañ adam meñ kahāñ hai ishq-e-butāñ

is ko yaañ se ḳharīd kar liije

vasl tab ho udhar jab īdhar se

pahle qat'-o-burīd kar liije

qatl kyā be-gunah kā mushkil hai

chāhiye jab shahīd kar liije

us kī ulfat meñ rote rote 'hasan'

ye siyah ko sapīd kar liije

naujawani ki did kar lije

apne mausam ki id kar lije

kaun kahta hai kaun sunta hai

apni guft-o-shunid kar lije

ab ke bichhDe miloge phir ki nahin

kuchh to wa'da waid kar lije

apne gesu daraaz ke mujh ko

silsile mein murid kar lije

hai masal ek nah sad aasan

yas hi ko umid kar lije

han adam mein kahan hai ishq-e-butan

is ko yan se KHarid kar lije

wasl tab ho udhar jab idhar se

pahle qat'-o-burid kar lije

qatl kya be-gunah ka mushkil hai

chahiye jab shahid kar lije

us ki ulfat mein rote rote 'hasan'

ye siyah ko sapid kar lije