nazar mila na sake us se is nigah ke baad

nazar milā na sake us se is nigāh ke baa'd

vahī hai haal hamārā jo ho gunāh ke baa'd

maiñ kaise aur kisī samt moḌtā ḳhud ko

kisī kī chaah na thī dil meñ terī chaah ke baa'd

havas ne toḌ dī barsoñ kī sādhnā merī

gunāh kyā hai ye jaanā magar gunāh ke baa'd

zamīr kaañp to jaatā hai aap kuchh bhī kaheñ

vo ho gunāh se pahle ki ho gunāh ke baa'd

kaTī huī thiiñ tanābeñ tamām rishtoñ kī

chhupātā sar maiñ kahāñ tujh se rasm-o-rāh ke baa'd

gavāh chaah rahe the vo be-gunāhī kā

zabāñ se kah na sakā kuchh ḳhudā gavāh ke baa'd

nazar mila na sake us se is nigah ke ba'd

wahi hai haal hamara jo ho gunah ke ba'd

main kaise aur kisi samt moDta KHud ko

kisi ki chah na thi dil mein teri chah ke ba'd

hawas ne toD di barson ki sadhna meri

gunah kya hai ye jaana magar gunah ke ba'd

zamir kanp to jata hai aap kuchh bhi kahen

wo ho gunah se pahle ki ho gunah ke ba'd

kaTi hui thin tanaben tamam rishton ki

chhupata sar main kahan tujh se rasm-o-rah ke ba'd

gawah chah rahe the wo be-gunahi ka

zaban se kah na saka kuchh KHuda gawah ke ba'd