nazar mili to nazaron mein banT di maine

nazar milī to nazāroñ meñ baañT dī maiñ ne

ye raushnī bhī sitāroñ meñ baañT dī maiñ ne

bas ek shaam bachī thī tumhāre hisse kī

magar vo shaam bhī yāroñ meñ baañT dī maiñ ne

janāb qarz chukāyā hai yuuñ anāsir kā

ki zindagī inhī chāroñ meñ baañT dī maiñ ne

pukārte the barābar mujhe safar ke liye

matā-e-ḳhvāb savāroñ meñ baañT dī maiñ ne

havā mizāj thā kartā bhī kyā samundar kā

ik ek lahr kināroñ meñ baañT dī maiñ ne

nazar mili to nazaron mein banT di main ne

ye raushni bhi sitaron mein banT di main ne

bas ek sham bachi thi tumhaare hisse ki

magar wo sham bhi yaron mein banT di main ne

janab qarz chukaya hai yun anasir ka

ki zindagi inhi chaaron mein banT di main ne

pukarte the barabar mujhe safar ke liye

mata-e-KHwab sawaron mein banT di main ne

hawa mizaj tha karta bhi kya samundar ka

ek ek lahr kinaron mein banT di main ne