nibhao ab use jo waza bhi bana li hai

nibhāo ab use jo vaz.a bhī banā lī hai

vagarna dahr to ahl-e-vafā se ḳhālī hai

harīm-e-dil meñ tirī aarzū ne raushan kī

vo aag jis ne shab-e-zindagī ujālī hai

tirī nigāh-e-karam hai vagarna ai ġham-e-dost

zamāna kyā tire shaidā.iyoñ se ḳhālī hai

sitam hai merī taraf pyaar se nazar na kare

vo but ki jis meñ mire fan ne jaan Daalī hai

bajā ki husn kā ehsās hai fareb-e-nazar

magar vo naqsh jo dil meñ hai kab ḳhayālī hai

ufuq se gard chhaTe to ḳhabar mile shāyad

sahar tulū huī hai ki hone vaalī hai

ab ahl-e-bazm ġham-e-tīrgī kareñ to kareñ

hamāre paas to jo sham.a thī jalālī hai

havā ke dosh pe uḌtī huī ḳhabar to suno

havā kī baat bahut duur jaane vaalī hai

nibhao ab use jo waza bhi bana li hai

wagarna dahr to ahl-e-wafa se KHali hai

harim-e-dil mein teri aarzu ne raushan ki

wo aag jis ne shab-e-zindagi ujali hai

teri nigah-e-karam hai wagarna ai gham-e-dost

zamana kya tere shaidaiyon se KHali hai

sitam hai meri taraf pyar se nazar na kare

wo but ki jis mein mere fan ne jaan Dali hai

baja ki husn ka ehsas hai fareb-e-nazar

magar wo naqsh jo dil mein hai kab KHayali hai

ufuq se gard chhaTe to KHabar mile shayad

sahar tulu hui hai ki hone wali hai

ab ahl-e-bazm gham-e-tirgi karen to karen

hamare pas to jo shama thi jalali hai

hawa ke dosh pe uDti hui KHabar to suno

hawa ki baat bahut dur jaane wali hai