paya nahin wo jo kho raha hun

paayā nahīñ vo jo kho rahā huuñ

taqdīr ko apnī ro rahā huuñ

is soch meñ zindagī bitā dī

jaagā huā huuñ ki so rahā huuñ

phir kis se uThegā bojh merā

is fikr meñ ḳhud ko Dho rahā huuñ

kāñToñ ko pilā ke ḳhuun apnā

rāhoñ meñ gulāb bo rahā huuñ

jharnā ho nadī ho yā samundar

kuuze meñ sab samo rahā huuñ

har rañg gañvā chukā hai pahchān

paanī meñ qalam Dubo rahā huuñ

patthar ke libās ko maiñ 'shāhid'

shīshe kī siloñ pe dho rahā huuñ

paya nahin wo jo kho raha hun

taqdir ko apni ro raha hun

is soch mein zindagi bita di

jaga hua hun ki so raha hun

phir kis se uThega bojh mera

is fikr mein KHud ko Dho raha hun

kanTon ko pila ke KHun apna

rahon mein gulab bo raha hun

jharna ho nadi ho ya samundar

kuze mein sab samo raha hun

har rang ganwa chuka hai pahchan

pani mein qalam Dubo raha hun

patthar ke libas ko main 'shahid'

shishe ki silon pe dho raha hun