parda raha ki jalwa-e-wahdat-numa hua

parda rahā ki jalva-e-vahdat-numā huā

ġhash ne ḳhabar na dī mujhe kab sāmnā huā

dushman kī dostī kā natīja burā huā

ḳhanjar gale milā to mirā sar judā huā

mahshar meñ rañg-e-chehra-e-zālim havā huā

sach hai burā huā ki mirā sāmnā huā

gulshan se uTh ke merā makāñ dil meñ aa gayā

ik daaġh ban gayā hai nasheman jalā huā

kyā tīrgī liye hue aa.ī shuā-e-nūr

dekhā shab-e-firāq azal kā likhā huā

ghar dil meñ kar chukā hai mirā nauha-e-qafas

sayyād qaid hogā agar maiñ rihā huā

jab tak thā maiñ uruuj pe thā husn-e-jāñ-sitāñ

phir kuchh ḳhabar nahīñ ki mire ba.ad kyā huā

kahne ko musht-e-par kī asīrī to thī magar

ḳhāmosh ho gayā hai chaman boltā huā

tū jis meñ thā vo manzil-e-hastī meñ hai zarūr

merī fanā se dil mirā kyuuñ kar fanā huā

niiñd un kī yuuñ uḌī hai ki aatī nahīñ kabhī

marne ke ba.ad ab mirā nāla-rasā huā

sayyād kā ghar aaj hai jaise chaman thā kal

shāyad qafas kā baiThne vaalā rihā huā

tasvīr merī umr-e-guzishta kī dekh jaao

turbat pe ik charāġh hī vo bhī bujhā huā

apne bhī mujh se ḳhush na rahe bāġh-e-dahr meñ

bigḌā kiyā mujhī se nasheman banā huā

chamkā hai kuchh vo jalva-e-ruḳh ho ki dāġh-e-ishq

donoñ diloñ meñ ek na ik mubtalā huā

DhūñDe na mil sake mujhe zulmat meñ māh-o-sāl

rū-e-sahar bhī chashma-e-āb-e-baqā huā

ik umr ho ga.ī ki hai bārish meñ chashm-e-tar

ab tak na koī naḳhl-e-tamannā harā huā

'sāqib' ḳhabar na thī ki falak meñ haiñ gardisheñ

maiñ aa ke dāna-e-dahn-e-āsiyā huā

parda raha ki jalwa-e-wahdat-numa hua

ghash ne KHabar na di mujhe kab samna hua

dushman ki dosti ka natija bura hua

KHanjar gale mila to mera sar juda hua

mahshar mein rang-e-chehra-e-zalim hawa hua

sach hai bura hua ki mera samna hua

gulshan se uTh ke mera makan dil mein aa gaya

ek dagh ban gaya hai nasheman jala hua

kya tirgi liye hue aai shua-e-nur

dekha shab-e-firaq azal ka likha hua

ghar dil mein kar chuka hai mera nauha-e-qafas

sayyaad qaid hoga agar main riha hua

jab tak tha main uruj pe tha husn-e-jaan-sitan

phir kuchh KHabar nahin ki mere baad kya hua

kahne ko musht-e-par ki asiri to thi magar

KHamosh ho gaya hai chaman bolta hua

tu jis mein tha wo manzil-e-hasti mein hai zarur

meri fana se dil mera kyun kar fana hua

nind un ki yun uDi hai ki aati nahin kabhi

marne ke baad ab mera nala-rasa hua

sayyaad ka ghar aaj hai jaise chaman tha kal

shayad qafas ka baiThne wala riha hua

taswir meri umr-e-guzishta ki dekh jao

turbat pe ek charagh hi wo bhi bujha hua

apne bhi mujh se KHush na rahe bagh-e-dahr mein

bigDa kiya mujhi se nasheman bana hua

chamka hai kuchh wo jalwa-e-ruKH ho ki dagh-e-ishq

donon dilon mein ek na ek mubtala hua

DhunDe na mil sake mujhe zulmat mein mah-o-sal

ru-e-sahar bhi chashma-e-ab-e-baqa hua

ek umr ho gai ki hai barish mein chashm-e-tar

ab tak na koi naKHl-e-tamanna hara hua

'saqib' KHabar na thi ki falak mein hain gardishen

main aa ke dana-e-dahn-e-asiya hua