phir ek dagh charagh-e-safar banate hue

phir ek daaġh charāġh-e-safar banāte hue

nikal paḌe haiñ na.ī rah-guzar banāte hue

vo jast bhar ke havā ho gayā magar na khulā

maiñ kis navāh meñ thā us ke par banāte hue

nikal sakī na koī aur sūrat-e-tasvīr

bahā.e ashk bahut chashm-e-tar banāte hue

vo qahr barhamī-e-baḳht hai ki Darte haiñ

girā na leñ kahīñ dīvār dar banāte hue

qadam qadam pe sazā de rahā hai vaqt hameñ

hamāre aib udū ke hunar banāte hue

to zindagī ko ji.eñ kyuuñ na zindagī kī tarah

kahīñ pe phuul kahīñ par sharar banāte hue

phir ek dagh charagh-e-safar banate hue

nikal paDe hain nai rah-guzar banate hue

wo jast bhar ke hawa ho gaya magar na khula

main kis nawah mein tha us ke par banate hue

nikal saki na koi aur surat-e-taswir

bahae ashk bahut chashm-e-tar banate hue

wo qahr barhami-e-baKHt hai ki Darte hain

gira na len kahin diwar dar banate hue

qadam qadam pe saza de raha hai waqt hamein

hamare aib udu ke hunar banate hue

to zindagi ko jien kyun na zindagi ki tarah

kahin pe phul kahin par sharar banate hue