phir sar kisi ke dar pe jhukae hue hain hum

phir sar kisī ke dar pe jhukā.e hue haiñ ham

parde phir āsmāñ ke uThā.e hue haiñ ham

chhā.ī huī hai ishq kī phir dil pe be-ḳhudī

phir zindagī ko hosh meñ laa.e hue haiñ ham

jis kā har ek juzv hai iksīr-e-zindagī

phir ḳhaak meñ vo jins milā.e hue haiñ ham

haañ kaun pūchhtā hai ḳhushī kā nahufta raaz

phir ġham kā baar dil pe uThā.e hue haiñ ham

haañ kaun dars-e-ishq-e-junūñ kā hai ḳhvāst-gār

aa.e ki har sabaq ko bhulā.e hue haiñ ham

aa.e jise ho jāda-e-rif.at kī aarzū

phir sar kisī ke dar pe jhukā.e hue haiñ ham

bai.at ko aa.e jis ko ho tahqīq kā ḳhayāl

kaun-o-makāñ ke raaz ko paa.e hue haiñ ham

hastī ke dām-e-saḳht se uktā gayā hai kaun

kah do ki phir giraft meñ aa.e hue haiñ ham

haañ kis ke pā-e-dil meñ hai zanjīr-e-āb-o-gil

kah do ki dām-e-zulf meñ aa.e hue haiñ ham

haañ kis ko justujū hai nasīm-e-farāġh kī

āsūdgī ko aag lagā.e hue haiñ ham

haañ kis ko sair-e-arz-o-samā kā hai ishtiyāq

dhūnī phir us galī meñ ramā.e hue haiñ ham

jis par nisār kaun-o-makāñ kī haqīqateñ

phir 'josh' us fareb meñ aa.e hue haiñ ham

phir sar kisi ke dar pe jhukae hue hain hum

parde phir aasman ke uThae hue hain hum

chhai hui hai ishq ki phir dil pe be-KHudi

phir zindagi ko hosh mein lae hue hain hum

jis ka har ek juzw hai iksir-e-zindagi

phir KHak mein wo jins milae hue hain hum

han kaun puchhta hai KHushi ka nahufta raaz

phir gham ka bar dil pe uThae hue hain hum

han kaun dars-e-ishq-e-junun ka hai KHwast-gar

aae ki har sabaq ko bhulae hue hain hum

aae jise ho jada-e-rifat ki aarzu

phir sar kisi ke dar pe jhukae hue hain hum

baiat ko aae jis ko ho tahqiq ka KHayal

kaun-o-makan ke raaz ko pae hue hain hum

hasti ke dam-e-saKHt se ukta gaya hai kaun

kah do ki phir giraft mein aae hue hain hum

han kis ke pa-e-dil mein hai zanjir-e-ab-o-gil

kah do ki dam-e-zulf mein aae hue hain hum

han kis ko justuju hai nasim-e-faragh ki

aasudgi ko aag lagae hue hain hum

han kis ko sair-e-arz-o-sama ka hai ishtiyaq

dhuni phir us gali mein ramae hue hain hum

jis par nisar kaun-o-makan ki haqiqaten

phir 'josh' us fareb mein aae hue hain hum